परभणी : ‘‘कृषी सहायक, कृषी पर्यवेक्षक आणि तालुका कृषी अधिकाऱ्यांनी अधिक तत्परतेने शेतकऱ्यांची प्रकरणे निकालात काढावीत’’, अशा सूचना नानाजी देशमुख कृषी संजीवनी प्रकल्पाच्या प्रकल्प संचालक इंद्रा मालो यांनी मराठवाड्याच्या दौऱ्यात दिल्या. 

मालो म्हणाल्या, ‘‘पोकरा प्रकल्पामुळे मराठवाड्यातील शेतकऱ्यांच्या आर्थिक स्थितीमध्ये सुधारणा होण्यास मदत मिळत आहे. वैयक्तिक शेतकऱ्यांबरोबर शेतकरी व महिला गट तसेच शेतकरी उत्पादक कंपन्यांनी प्रकल्पाच्या आर्थिक साह्याने शेतीमध्ये व्यावसायिकता वाढविण्यास सुरुवात केली आहे. बहुतांशी गावांचा बदलत्या हवामानास तोंड देण्यासाठी प्रयत्न सुरू आहेत. शेतकऱ्यांचा असाच प्रतिसाद राहिला, तर प्रकल्पाच्या उद्देशानुसार ही गावे अधिक सक्षम बनतील. त्यामुळे कृषी विभागाच्या क्षेत्रीय अधिकाऱ्यांनी व कर्मचाऱ्यांनी त्यांच्या स्तरावरील मंजुरीसाठी होत असलेल्या विलंबाचा कालावधी कमी करण्याची आवश्यकता आहे.’’   

मराठवाड्यातील परभणी आणि नांदेड जिल्ह्यांतील कामांची पाहणी आणि क्षेत्रीय अधिकाऱ्यांच्या आढावा बैठका घेण्यासाठी नुकताच प्रक्षेत्र दौरा मालो यांनी केला. यामध्ये परभणीचे जिल्हाधिकारी, मुंबई येथील प्रकल्प कार्यालयातील विशेषज्ञ, तसेच कृषी विभागाचे वरिष्ठ अधिकारी उपस्थित होते.

दौऱ्यामध्ये परभणी जिल्ह्यातील धानोरा काळे, केकरजवळा या गावांना भेटी देऊन शेड नेटमधील टोमॅटो, मिरची पिकांची लागवड, पॉलिहाउसमधील जरबेरा लागवड, ठिबक सिंचन आणि पेरू लागवड इत्यादी कामांची पाहणी केली. नांदेड जिल्ह्यातील केळी उत्पादक कंपनीच्या स्वयंचलित पॅकिंग युनिटला आणि स्थानिक शेतकऱ्यांनी उत्पादित केलेल्या हळद, मिरची व धने या शेतीमालावर प्रक्रिया करून मसाले उद्योग उभारणी केलेल्या उत्पादक कंपनीच्या कामाची पाहणी करण्यात आली.