नांदेड : जिल्ह्यातील माहूर तालुक्यातील अनेक मंडळांमध्ये गुरुवारी (ता. २) सकाळी झालेला जोरदार पाऊस, गारपिटीमुळे तूर, हरभरा, गहू, ज्वारी आदी पिकांचे मोठे नुकसान झाले.

परभणी, हिंगोली जिल्ह्यांतील अनेक भागांत पावसाने हजेरी लावली. या जिल्ह्यांत गेल्या आठवड्यापासून ढगाळ वातावरण आहे. गेल्या दोन दिवसांपासून पाऊस येत आहे. त्यामुळे काढणीस आलेल्या तुरीसह हरभरा, गहू, ज्वारी आदी रब्बी पिकांना मोठा तडाखा बसला. नुकसान होत असल्याने शेतकरी धास्तावले आहेत. नुकसानीचे पंचनामे करून मदत देण्याची मागणी केली आहे.

नांदेड जिल्ह्यात सलग दुसऱ्या दिवशीही अवकाळी पावसाने हजेरी लावली. गुरुवारी सकाळी आठपर्यंत आणि त्यानंतर माहूर, मुदखेड, भोकर, लोहा, हदगाव तालुक्यात मध्यम ते जोरदार पाऊस झाला. माहूर, वानोळा, वाई बाजार, सिंदखेड आदी मंडळांमध्ये मध्यम ते जोरदार हजेरी लावली. रुई, धनोडा (जि. यवतमाळ) आदी गावांत गारा पडल्या. पावसाचे पाणी हरभरा, गहू आदीसह भाजीपाला पिकांमध्ये साचून राहिल्याने नुकसान झाले.

गारपिटीमुळे तुरीचे पीक झोडपून निघाले. परभणी जिल्ह्यातील अनेक भागात गेल्या दोन तीन दिवसांपासून अवकाळी पाऊस पडत आहे. हिंगोली जिल्ह्यातील हिंगोली, कळमनुरी तालुक्यासह अन्य भागात हलका ते मध्यम पाऊस झाला. 

मंडळनिहाय पाऊस (मिमी)

नांदेड जिल्हा ः माहूर १८, वानोळा १०, वाई बाजार २१, सिंदखेड २४, दाभड ४, मुगट, १०, बारड ४, भोकर २, मातुल २,मनाठा १०, पिंपरखेड २, आष्टी २.