नगर : जिल्ह्यात सलग तिसऱ्या दिवशी बुधवारी (ता.३) पाऊस झाला. सकाळी आठ वाजेपर्यंत सर्वच तालुक्यांत पावसाने हजेरी लावली. ४० महसूल मंडळांत चांगला पाऊस झाला. आतापर्यंत यंदाच्या पावसाच्या सरासरीत दहा टक्के पाऊस झाल्याची प्रशासनाकडे नोंद झाली आहे. 

जिल्हयात मंगळवारी रात्री जोरदार पाऊस झाला. नगर, राहुरी, अकोले, कर्जत, पारनेर, पाथर्डी भागात, रात्री आठनंतर जोरदार पाऊस झाला. त्यामुळे गावतलाव, पाझर तलावासह बंधाऱ्यांत पाणी साठले. निसर्ग चक्रीवादळाचाही काहिसा परिणाम जिल्ह्यात दिसून आला. बुधवारी दुपारनंतर वाऱ्याचा वेग वाढला. पावसाची रिमझिम दिवसभर सुरु होती. या पावसामुळे काही प्रमाणात फळे, भाजीपाल्याला फटका बसला.

खरिपाच्या शेतमशागतीला वेग येणार आहे. अजून काही प्रमाणात पाऊस झाला तर मॉन्सून येण्याआधीच पेरणी, कापूस लागवडीला वेग येणार आहे. आतापर्यंत पारनेरमध्ये वीस टक्के तर कर्जत, श्रीरामपुरमध्ये सोळा टक्के पाऊस झाल्याची नोंद आहे. गेल्यावर्षी आजच्या तारखेला आजीबात पाऊस नव्हता.   

मंडळनिहाय पाऊस (मि.मी) 

काष्टी, चिंभळा, नायगा ः २४, बेलवंडी ः २६, मांडवगण ः ४०, कर्जत ः २८, कोंभळी ः २२, राहुरी ः २८, वांबोरी ः २३, देवळाली प्रवरा ः २९, नेवासा ः ३४, सलाबतपूर ः ४०, कुकाणा ः ३०, चांदा ः २२, घोडेगाव ः २१, नालेगाव ः ३८, जेऊर ः ३०, रुईछत्तीशी ः ३०, चास ः २७, भिंगार ः ३९, वाळकी ः ३२, चिचोंडी पाटील ः २५, सावेडी ः ३७, टाकळी मानुर - ३७, कोरडगाव ः ३१, शेवगाव ः ३२, चापडगाव ः ४७, भातकुडगाव ः २० पारनेर ः ३६, सुपा ः ३०, वाडेगव्हाण ः २८, टाकळा ढोकेश्वर ः २६, संगमनेर ः २४, साकुर ः २६, अकोले २७, कोतुळ ः २६.