पुणे : पूर्वमोसमी पावसाने उघडीप देताच राज्यातील उन्हाचा ताप, उकाडा वाढला आहे. राज्याच्या अनेक भागात उन्हाचा चटका कायम राहणार आहे. तर पूर्व विदर्भातील गोंदिया, गडचिरोली, चंद्रपूर जिल्ह्यात तुरळक ठिकाणी हलक्या पावसाशी शक्यता हवामान विभागाने वर्तविली आहे. गुरुवारी (ता. २३) सकाळपर्यंतच्या २४ तासांमध्ये अकोला येथे उच्चांकी ४२ अंश सेल्सिअस तापमानाची नोंद झाली.  पूर्वमोसमी पावसाचे ढग, वाहणारे वारे यामुळे अनेक ठिकाणी तापमानाचा पारा चाळीशीच्या खाली घसरला होता. पावसाने उघडीप दिल्यानंतर पुन्हा तापमान वाढण्यास सुरूवात झाली आहे. गुरूवारी (ता.२३) सकाळपर्यंतच्या २४ तासांमध्ये विदर्भात बहुतांशी ठिकाणी तर मराठवाड्यातील परभणी, मध्य महाराष्ट्रातील जळगाव, धुळे, मालेगाव, सोलापूरात तापमान ४० अंशांच्या पुढे आहे. उन्हाचा चटका वाढण्याची शक्यता आहे.  विदर्भ आणि परिसरावर समुद्रसपाटीपासून ९०० मीटर उंचीवर चक्राकार वाऱ्याची स्थती आहे. त्यापासून मराठवाडा, कर्नाटक, तामिळनाडूपासून कोमोरीन भागापर्यंत हवेचा कमी दाबाचा पट्टा विस्तारला आहे. पूर्व विदर्भात पूर्वमोसमी पावसाला पोषक हवामान असल्याने गोंदिया, गडचिरोली, चंद्रपूरात तुरळक ठिकाणी हलक्या पावसाचा अंदाज आहे.  गुरूवारी (ता. २३) सकाळपर्यंतच्या २४ तासांमध्ये राज्यातील विविध ठिकाणचे कमाल तापमान (अंश सेल्सिअसमध्ये) : पुणे ३८.८, जळगाव ४१.०, धुळे ४१.२, कोल्हापूर ३६.५, महाबळेश्‍वर ३२.१, मालेगाव ४०.२, नाशिक ३७.८, निफाड ३८.०, सांगली ३८.०, सातारा ३८.६, सोलापूर ४१.३, डहाणू ३४.८, सांताक्रूझ ३३.७, रत्नागिरी ३३.९, औरंगाबाद ३८.८, परभणी ४१.९, अकोला ४२.०, अमरावती ४०.०, बुलडाणा ३९.०, ब्रह्मपुरी ४०.९, चंद्रपूर ४१.०, गोंदिया ३९.८, नागपूर ४०.२, वाशीम ४०.०, वर्धा ४१.२.