नाशिक : ‘‘नांदगाव तालुक्यात ८२७० हेक्टर क्षेत्रावर कपाशी पिकाची लागवड करण्यात आली. शास्त्रज्ञांचे व कृषी विभागाच्या सूचनेनूसार ऑक्टोबर-नोव्हेंबर या दरम्यान बोंड अळीचा प्रादुर्भाव वाढण्याची शक्यता वर्तविण्यात आली आहे. यासाठी तालुक्यातील मोरझर येथे कापूस उत्पादक शेतकऱ्यांना बोंड अळी व्यवस्थापनावर मार्गदर्शन करण्यात आले. 

नांदगाव तालुक्यात२ ते १० नोव्हेंबर बोंडअळी व्यवस्थापन कार्यक्रम, गावोगावी प्रचार फेरी, शिवार बैठका घेऊन जनजागृती करण्यात येत आहे. यासाठी कृषी विज्ञान केंद्र वडेल (ता.मालेगाव) येथील पीक संरक्षण विषय विशेषज्ञ विशाल चौधरी यांनी नांदगाव मंडळातील मोरझर, तांदुळवाडीत मार्गदर्शन केले. 

तालुक्यात एप्रिल- मे महिन्यात बोंड अळी व लष्करी अळी निर्मूलनाबाबत मोहीम हाती घेण्यात आली होती. बोंड अळी निर्मूलनासाठी जनजागृती करणे, प्रथम निंबोळी अर्क फवारणी करणे, पक्षी थांबे उभारणे, कामगंध सापळे लावणे आदी  उपाययोजना करण्यात आल्या. त्याचा फायदा होऊन सुरवातीला बोंड आळीपासून कपाशी पीक वाचविण्यात आले, असे चौधरी यांनी सांगितले.