दाताळा, जि. बुलडाणा : महावितरण कंपनीला १०० टक्के वीज देयकाची वसुली देणाऱ्या दाताळा गावात भारनियमन केले जात आहे. त्यामुळे ग्रामस्थांनी तत्काळ भारनियमन बंद करण्याच्या मागणीसाठी कंपनीच्या कार्यालयावर मोर्चा काढला. या वेळी अ‍ॅड. हरीश रावळ, विलास खर्चे यांनी कंपनीच्या कार्यकारी अभियंत्यांना तीव्र अांदोलनाचा इशारा दिला.

मलकापूर तालुक्यातील दाताळा हे गाव १०० टक्के वीज देयकाची वसुली देणारे गाव म्हणून अोळखले जाते. यापूर्वी या ठिकाणी कोणत्याही प्रकारचे भारनियमन केले जात नव्हते. परंतु एक महिन्यापासून काही राजकीय लोकांच्या व लोकप्रतिनिधींच्या दबावामुळे महावितरण कंपनीने जाणूनबुजून दाताळा येथील इंदिरा नगर, पुरपिडी, गोपाल नगर, गणपती नगर, शिव कॉलनी, समता नगरमध्ये सात तासांचे भारनियमन सुरू आहे. हा अन्याय दूर करावा, अशी मागणी मोर्चेकऱ्यांनी केली.