नवी दिल्ली: आसाम आणि बिहार या दोन्ही राज्यांमध्ये पुराने हाहाकार उडाला आहे. पूर आणि भूस्खलनामुळे आसाममध्ये १२३ जणांचा मृत्यू झाला असून बिहारमध्ये १० जणांना आपले प्राण गमवावे लागले. दोन्ही राज्यांमध्ये आत्तापर्यंत ३६ लाख लोक पुराने प्रभावित झाले आहेत. प्रशासनाच्या वतीने लोकांना सुरक्षित स्थळी पोचविण्याचे काम सुरु आहे. सरकारच्या माहितीनुसार आसामध्ये २७ जिल्ह्यांतील तब्बल २६ लाख ३८ हजार लोक प्रभावित झाले आहेत. तर पुरामुळे ९७ जणांचा मृत्यू झाला असून २६ जणांना भूस्खलनामुळे आपले प्राण गमवावे लागले. ग्वालपाडा जिल्हा पुराने सर्वाधिक प्रभावात आहे. जिल्ह्यातील तब्बल ४ लाख ७० हजार लोकांना पुराचा फटका बसला आहे. त्यापाठोपाठ बारपेट जिल्ह्यातील ४ लाख २४ हजार लोकांना पुराने प्रभावित केले आहे. मोरीगाव जिल्ह्यातील ३ लाख ७५ हजार लोकांना फटका बसला.

नद्या धोक्याच्या पातळीवर  आसाममधील ब्रम्हपुत्रा नदी गुवाहाटी, तेजपूर, धुबरी आणि ग्वालपाडा शहरांमधून धोक्याच्या पातळीवरून वाहत आहे. ब्रम्हपुत्रेच्या धनसरी, जिया भराली, कोपिली, बेकी आणि संकोश या उपनद्या अनेक ठिकाणी धोक्याच्या पातळीवरून वाहत आहेत. काजीरंगा उद्यानातील १२७ प्राण्यांचा पुराने मृत्यू झाला आहे.