नांदेड : अतिवृष्टी तसेच संततधार पावसामुळे जिल्ह्यातील हजारो हेक्टरवरील खरीप पिकांचे नुकसान झाले. याबाबत विमा भरलेल्या शेतकऱ्यांना स्थानिक नैसर्गिक आपत्तीत विमा कंपनीला ७२ तासांच्या आत कळविण्याची मुदत होती. परंतु या कालावधीत कंपनीचा टोलफ्री नंबर बंद होता. तर ई-मेलव्दारे कळविण्यासाठी शेतकऱ्यांना जमले नाही. यामुळे नुकसान झालेले हजारो शेतकरी दावे दाखल करण्यापासून वंचित राहिले आहेत. 

जिल्ह्यात जुलै महिन्यात जोरदार पाऊस झाला. यावेळी अनेकवेळा अतिवृष्टीची नोंद झाली. तसेच संततधार पावसामुळे नदी-नाल्यांना पूर आला. सखल भागातील शेताचे तळे झाले होते. यामुळे खरिपातील सोयाबीन, कपाशी, तूर, मुग, उडीद, ज्वारी यासह भाजीपाला व फळपिकांचे मोठ्या प्रमाणात नुकसान झाले. नुकसानीचे प्रमाण अधिक असल्यामुळे जिल्हा प्रशासनाने नुकसानग्रस्त शेतकऱ्यांनी ७२ तासाच्या आत विमा कंपनीला नुकसानीबाबत कळविण्याचे आवाहन केले होते. परंतु या कालावधीत पावसामुळे अनेक भागात वीज खंडित झाली होती. तसेच विमा कंपनीचा टोलफ्री नंबर लागला नाही. विमा कंपनीचे तालुका प्रतिनिधीही फोन घेत नव्हते. ई-मेल करण्यासाठी शेतकऱ्यांकडे यंत्रणा नसल्यामुळे हजारो शेतकऱ्यांना नुकसानीबाबत दावे दाखल करता आले नाहीत. यामुळे नुकसान होऊन अनेकांना भरपाईपासून वंचित राहावे लागणार आहे.  प्रतिक्रिया  अतिवृष्टीनंतर विमा कंपनीकडे क्लेम करण्यासाठी दिलेला टोलफ्री नंबर लागत नव्हता. कंपनीचे प्रतिनिधीही फोन उचलत नव्हते, यामुळे नुकसान होवूनही दावा दाखल करता आला नाही.  - माधव कदम, शेतकरी, लिंगणकेरुर, ता. देगलूर