परभणी : बाजारामध्ये कोणत्याही शेतीमालाला आधारभूत किंमती एवढाही भाव मिळत नाही. त्यामुळे शासनाचे प्रतिनिधी म्हणून जिल्हाधिकाऱ्यांनी शेतीमालाची खरेदी करावी, अशी मागणी करत शेतकरी सुकाणू समितीच्या कार्यकर्त्यांनी शुक्रवारी (ता.१०) जिल्हाधिकारी पी. शिवशंकर यांच्या दालनामध्ये सोयाबीन तसेच कापूस आणून टाकला.

यंदा परभणी जिल्ह्यात खरिप हंगामातील मूग, उडीद, सोयाबीन, कापूस या पिकांच्या उत्पादनात ६० ते ७० टक्के घट आली आहे. त्यात बाजारामध्ये व्यापारी सर्वच शेतमालाची आधारभूत किंमतीपेक्षा कमी दराने खरेदी करत आहेत. सोयाबीनची आधारभूत किंमत ३,०५० रुपये प्रतिक्विंटल असताना व्यापारी १२०० ते २२०० रुपये प्रतिक्विंटल दराने खरेदी करत आहेत.

कापूस, मूग, उडीद या पिकांच्या बाबतीत हीच परिस्थिती आहे. आधारभूत किंमतीपेक्षा कमी दराने खरेदी करणाऱ्या व्यापाऱ्यांवर गुन्हे दाखल केले जात नाहीत. जिल्ह्यातील शासकीय खरेदी केंद्रावर आजवर केवळ नऊ क्विंटल सोयाबीनची खरेदी झाली आहे.

बाजारात कोणत्याही शेतमालास आधारभूत किंमत मिळत नसल्यामुळे शासनाचे प्रतिनिधी म्हणून जिल्हाधिकारी पी. शिवशंकर यांनी शेतमालाची खरेदी करुन शेतकऱ्यांना आधारभूत किंमतीप्रमाणे रक्कम द्यावी, या मागणीसाठी शेतकरी सुकाणू समितीचे विलास बाबर, माउली कदम, अनंत कदम, मुंजाभाऊ कदम, नारायण आवचार, रोहिदास हरकळ आदीसह अनेक कार्यकर्ते, शेतकऱ्यांनी जिल्हाधिकाऱ्यांच्या दालनात कापूस आणि सोयाबीन आणून टाकले.