नवी दिल्ली : केंद्र सरकारने आणलेल्या कृषिविषयक विधेयकांविरुद्ध शेतकऱ्यांमध्ये संताप वाढीस लागला आहे. तसेच अनेक पक्षांनी शेतकऱ्यांच्या बाजूने उभे राहत विरोध केला. पंजाब आणि हरियानात ठिकठिकाणी शेतकरी या विधेयकांविरोधात आंदोलने करत आहेत. 

दरम्यान, शिरोमणी अकाली दलच्या हरसिमरत कौर बादल यांचा राजीनामा राष्ट्रपतींनी मंजूर केला आहे. कॉंग्रेसनेही या विधेयकांना विरोध केला आहे. बहुजन समाज पक्षाच्या अध्यक्षा मायावती यांनीही कृषी विधेयकांना विरोध असल्याचे ट्वीट करून सांगितले. तर, किसान मजदूर संघर्ष समितीने २४ ते २६ सप्टेंबरदरम्यान आंदोलनाची हाक दिली आहे. 

पंजाबचे माजी मुख्यमंत्री प्रकाश सिंह बादल यांच्या घरासमोर बादल गावातील शेतकरी गेल्या १५ सप्टेंबरपासून आंदोलन करत आहेत. शुक्रवारी (ता.१८) सकाळी बादल गावातील एका ६० वर्षीय शेतकऱ्याने माजी मुख्यमंत्री प्रकाश सिंग बादल यांच्या घरासमोरच विष घेत आत्महत्येचा प्रयत्न केला. त्यानंतर पोलिसांनी ताबडतोब कारवाई करत शेतकऱ्याला बादल गावातील एका रुग्णालयात दाखल केले. विष प्राशन केलेल्या शेतकऱ्याची प्रकृती चिंताजनक आहे.