मुंबई : देशातील सर्वात मोठे प्लाझ्मा सेंटर असो की आणखी काही, महाराष्ट्राने नेहमीच देशाला पथदर्शी आणि भव्यदिव्य स्वरूपाचे काम करून दाखवले आहे. ‘महाजॉब्स’ हे संकेतस्थळ ही महाराष्ट्राच्या शिरपेचात मानाचा तुरा असून, काळाची गरज ओळखून हे पोर्टल सुरू करण्यात आले आहे. या पोर्टलच्या माध्यमातून भूमिपुत्रांना पारदर्शकपणे रोजगार किंवा नोकरी उपलब्ध करून दिली जावी, अशी अपेक्षा मुख्यमंत्री उद्धव ठाकरे यांनी व्यक्त केली.

राज्यातील स्थानिक भूमिपुत्रांना रोजगाराची संधी निर्माण करून देणाऱ्या http://mahajobs.maharashtra.gov.in या संकेतस्थळाचे मुख्यमंत्री श्री. ठाकरे यांच्या हस्ते लोकार्पण करण्यात आले. त्या वेळी ते बोलत होते.

उद्योगमंत्री सुभाष देसाई, कामगार मंत्री दिलीप वळसे पाटील, कौशल्य विकास मंत्री नवाब मलिक, उद्योग राज्यमंत्री आदिती तटकरे यांच्यासह उद्योग विभागाचे प्रधान सचिव बी वेणुगोपाल रेड्डी, एमआयडीसीचे मुख्य कार्यकारी अधिकारी डॉ. पी. अनबलगन, विकास आयुक्त डॉ. हर्षदीप कांबळे, राज्याच्या प्रत्येक भागातील उद्योजक आणि रोजगार संधीच्या शोधात असलेले भुमिपुत्र या कार्यक्रमात सहभागी झाले होते. या वेळी मुख्यमंत्र्यांनी राज्यातील युवकांसाठी मोबाईलवर ‘महाजॉब्स’ नावाचे ॲप उपलब्ध करून देण्याची सूचनाही उद्योग विभागाला दिली.