नगर  : जिल्ह्यातील भंडारदरा व निळवंडे धरण भरले आहे. आता मुळा धरणही भरण्याच्या मार्गावर आहे. मंगळवारी (ता. ६) दुपारी मुळा धरणाने ८० टक्क्यांचा टप्पा पार केला. मुळा नदीतून (कोतूळ जवळ) २० हजार क्युसेकने पाण्याची आवक धरणात होत आहे. मंगळवारी सकाळी धरणात २१ टीएमसी पाणीसाठा झाला होता. २३ टीएमसी पाणीसाठा झाला की धरणातून विसर्ग सुरू केला जाईल. साधारण १५ ऑगस्टपर्यंत धरणात २३ टीएमसी पाणीसाठा स्थिर ठेवला जाणार आहे, असे ‘मुळा’चे कार्यकारी अभियंता रावसाहेब मोरे यांनी सांगितले. 

जिल्ह्यात सध्या फक्त अकोले तालुक्याच्या पश्चिम भागात पाऊस होत आहे. त्यामुळे उत्तरेसाठी महत्त्वाचे असलेल्या भंडारदरा, निळवंडे व मुळा धरणात पाण्याची जोरदार आवक सुरू आहे. भंडारदरा व निळवंडे ही धरणे भरलेली असून तेथून पाणी सोडले आहे.

मुळा धरणात मंगळवारी सकाळी दहा वाजता ८० टक्के म्हणजे पावणे एकवीस टीएमसी पाणीसाठा झाला होता. हा साठा २३ टीएमसी झाली की नदीपात्रातून पाणी सोडण्याचे नियोजन आहे. मात्र, सोमवारच्या तुलनेत पाण्याची आवक कमी झाली होती. मंगळवारीही जोरदार आवक असती तर कदाचित लगेच पाणी सोडावे लागले असते. मात्र आवक कमी असल्याने मंगळवारच्या आवकेनुसार अजून अडीच टीएमसी पाणी जमा व्हायला दोन दिवस लागतील असा अंदाज आहे.

दरम्यान, धरणाच्या लाभक्षेत्रात पाऊस नसल्याने खरीप पिकांच्या सिंचनासाठी मंगळवारी धरणाच्या उजव्या कालव्यातून ७५० क्‍युसेक व डाव्या कालव्यातून १०० क्‍युसेकने आवर्तन सोडण्यात आले आहे.