नांदेड ः नांदेड, परभणी, हिंगोली या जिल्ह्यांत तब्बल आठवडाभरापासून सतत सुरू असलेल्या पावसामुळे लाखो हेक्टरवरील सोयाबीन, कपाशी, ज्वारी आदी पिकांचे कोट्यवधी रुपयांचे नुकसान झाले आहे. पाऊस थांबायला तयार नसल्याने शेतकरी हतबल झाले आहेत. हाती आलेली पिके पावसामुळे वाया गेल्याने दसऱ्यापाठोपाठ दिवाळी सणासाठीदेखील शेतकऱ्यांना उधार उसनवारी करण्याची वेळ आली आहे.

नांदेड, परभणी, हिंगोली जिल्ह्यांत यंदा सोयाबीनची ८ लाख ६३ हजार ६९ हेक्टरवर पेरणी झाली आहे. उशिरा पेरणी झाल्यामुळे सोयाबीन काढणीस उशीर झाला आहे. आत्तापर्यंत जेमतेम २५ टक्के क्षेत्रावरील सोयाबीन काढणी झाली असल्याचा अंदाज आहे. पावसाच्या माऱ्यामुळे सोयाबीनला मोड फुटले आहेत. या तीन जिल्ह्यांत कपाशीची ४ लाख ८५ हजार ७८६ हेक्टरवर लागवड झालेली आहे. पाऊस सुरू असल्याने बोंडे फुटलेल्या कापसाची वेचणी करता येत नाही. पाणी साचून राहत असल्याने झाडावरील बोंडे सडली आहेत. पाण्याचा निचरा होत नसल्याने जमीन शेवाळली आहे.

या तीन जिल्ह्यांत ४५ हजार ७९८ हेक्टरवर ज्वारीची पेरणी आहे. ज्वारीचे पीक काढणीच्या अवस्थेत आहे. परिपक्व झालेली कणसे भिजल्याने काळवंडली आहेत. तुरीची १ लाख ५२ हजार ४५१ हेक्टरवर लागवड झालेली आहे. सखल भागातील तूर पाण्याखाली गेल्याने मोठे नुकसान झाले आहे. लाखो हेक्टरवरील पिकांचे कोट्यवधी रुपयांचे नुकसान झाले आहे. शेतकऱ्यांना मदत देण्यासाठी संबंधित सर्व यंत्रंणांनी तत्काळ पंचनामे करणे आवश्यक आहे.