नाशिक : जिल्ह्यात पावसाने ओढ दिल्यानंतर पुन्हा पश्चिम पट्ट्यात जोरदार पाऊस होत आहे. त्यामध्ये सुरगाणा, पेठ, त्र्यंबकेश्वर, इगतपुरी तालुक्यात जोर दिसून आला. सोमवारी (ता.२१) मध्यरात्रीनंतर मंगळवार (ता. २२) दुपारपर्यंत धरणक्षेत्रात संततधार कायम आहे. त्यामुळे गंगापूर धरण समूहात पाणीसाठा वाढला आहे. तर मुसळधार पावसामुळे नांदगाव शहर व परिसरात पुन्हा जनजीवन विस्कळित झाल्याने मोठा फटका बसला. 

गंगापूर धरणाच्या पाणलोट क्षेत्रात संततधार सुरू आहे. त्यामुळे धरणाची पाणीपातळी वाढल्याने त्यातून पाण्याचा विसर्ग टप्प्याटप्प्याने करण्यात येत आहे. त्यामुळे गोदाकाठच्या नागरिकांना सतर्कतेचा इशारा देण्यात आला आहे. गंगापूर धरणातून दुपारी १ वाजता एकूण ६ हजार क्यूसेक्सचा विसर्ग सोडण्यात आला.

पेठ, सुरगाणा तालुक्यातील अनेक भागात मुसळधार पावसामुळे भात पिकाचे नुकसान झाले आहे. दिंडोरी, चांदवड व नाशिक तालुक्याच्या विविध भागात पावसाचा जोर दुपारपर्यंत होता. येवला, निफाड, कळवण, सटाणा, देवळा, सिन्नर तालुक्यात ढगाळ वातावरण कायम होते. मात्र किरकोळ स्वरूपात अनेक ठिकाणी हलक्या स्वरूपात पाऊस झाला. 

नांदगावला दाणादाण 

मंगळवार (ता. २१) दुपारपासून सुरू झालेल्या पावसाने नांदगाव शहर व परिसरात चांगलीच दाणादाण उडाली. नांदगाव महसूल मंडळात ८२ मिमी पावसाची नोंद झाली. गेल्या तेरा दिवसांपूर्वी शहरात झालेल्या मुसळधार पावसामुळे जनजीवन कोलमडून पडले होते. बाजारपेठेत पाणी शिरल्याने छोट्या व्यावसायिकांचे मोठे नुकसान झाले. या पावसामुळे पुन्हा लेंडी नदीपात्रात पाणी भरून वाहिले. शहराच्या रेल्वे फाटकाबाहेरील येवला रोड, औरंगाबाद रोड भागातील जनतेचा शहराशी असलेला जनसंपर्क पुन्हा खंडित झाला. गांधीनगर येथील पुरात वाहून जाणाऱ्या अरुण साळवे या व्यक्तीला युवकांनी वाचविले.