अमरावती : केंद्र सरकारकडून पारित करण्यात आलेल्या शेतकरी कायद्यांना काँग्रेसकडून सातत्याने विरोध केला जात आहे. या आंदोलनाचा एक भाग म्हणून जिल्हा ग्रामीण काँग्रेसच्या वतीने गुरुवारी (ता. ५) शेतकऱ्यांचा ट्रॅक्टर मोर्चा काढण्यात आला. सुमारे ८० ट्रॅक्टर शहरातील रस्त्यांवर आल्याने काँग्रेस पदाधिकारी व कार्यकर्त्यांमध्ये जोश संचारला होता.

स्थानिक राजकमल चौकातून दुपारी बारा वाजण्याच्या सुमारास या मोर्चाला सुरवात झाली. केंद्र सरकारकडून मंजूर  करण्यात आलेले तीन कायदे शेतकरी व कामगार विरोधी असल्याचा आरोप काँग्रेसच्या पदाधिकाऱ्यांनी केला. पालकमंत्री यशोमती ठाकूर, काँग्रेसचे जिल्हाध्यक्ष तथा जिल्हा परिषदेचे अध्यक्ष बबलू देशमुख, आमदार बळवंत वानखडे, माजी आमदार प्रा. वीरेंद्र जगताप आदी पदाधिकाऱ्यांनी मोर्चाचे नेतृत्व केले. हा मोर्चा जिल्हाधिकारी कार्यालयावर धडकला.

या वेळी केंद्र सरकारवर शेतकरी विरोधी असल्याचा आरोप करीत प्रचंड घोषणाबाजी करण्यात आली. काँग्रेसचे शेकडो पदाधिकारी तसेच कार्यकर्ते या मोर्चात सहभागी झाले होते.