अमरावती ः वरुड, मोर्शी तालुक्‍यात पूर्वमोसमी पावसामुळे संत्रा, गहू व इतर पिकांचे नुकसान झाले. पिकांवर कीडरोगांचा प्रादुर्भावही वाढीस लागला. त्याची दखल घेत आमदार देवेंद्र भुयार यांनी नुकसानग्रस्त भागाची पाहणी करुन शेतकऱ्यांच्या समस्या जाणून घेतल्या. 

पूर्वमोसमी पावसाची संततधार यावर्षी सुरुच आहे. त्याचा सर्वाधिक फटका संत्रा उत्पादकांना बसला आहे. रब्बी हंगामातील पिकांचे सर्व्हेक्षण, पंचनामे करुन शेतकऱ्यांना मदत मिळावी, अशी मागणी आमदार भुयार यांच्याकडे शेतकऱ्यांनी केली. 

अमरावती जिल्ह्यातील मोर्शी, वरुड तालुक्‍यात संत्रा हे महत्त्वाचे फळपिक आहे. शेतकऱ्यांचे अर्थकारण या पिकावरच अवलंबून आहे. वरुड, मोर्शी तालुक्‍यात अंदाजे तीन ते साडेतीन लाख टन संत्रा उत्पादन असून या दोन्ही तालुक्‍यांतील ३० टक्‍के म्हणजेच एक लाख टन संत्रा शिल्लक आहे. ३०० कोटी रुपये इतकी या संत्र्याची किंमत असून पावसाचा त्याला फटका बसला. शासन तसेच पीकविमा कंपनीने याची दखल घेत भरपाईसाठी पुढाकार घ्यावा, अशी मागणी यावेळी आमदार भुयार यांनी शासनाकडे केली आहे.