सोलापूर ः कुमठे येथील श्री सिद्धेश्‍वर सहकारी साखर कारखान्याच्या सहवीज प्रकल्पाच्या चिमणी पाडकामाची प्रक्रिया २४ जानेवारीपर्यंत थांबवावी, असे मुंबई उच्च न्यायालयाने आदेश दिले होते. त्या स्थगितीची मुदत २४ जानेवारीला संपली. त्यामुळे महापालिकेने चिमणी पाडकामाची प्रक्रिया राबवावी, अशा मागणीचे निवेदन सोलापूर विचार मंचने महापौरांना दिले. त्यानंतर महापौर श्रीकांचना यन्नम यांनी तसे पत्र आयुक्त पी. शिवशंकर यांना दिले आहे. 

सोलापूरच्या विमानतळाला अडथळा ठरणाऱ्या या चिमणीवरून गेल्या काही वर्षांपासून सातत्याने वाद सुरू आहे. न्यायालयीन आणि प्रशासकीय प्रक्रियेतील सर्व टप्पे या विषयाने पार केले आहेत. प्रत्येक वेळी कारवाईचा आदेश आणि त्यावर न्यायालयाच्या स्थगिती आदेशाने या विषयावर सर्वांचीच उत्सुकता ताणली गेली आहे.

गेल्याच आठवड्यात मुंबई उच्च न्यायालयाने दिलेल्या स्थगितीची मुदत संपल्यामुळे महापालिकेने पुढील कारवाई करणे गरजेचे आहे. त्याचप्रमाणे कारखान्याने केलेल्या प्रदूषणाबद्दल केंद्रीय प्रदूषण मंडळाने चौकशी करण्याचेही सांगितले आहे. 

याची सविस्तर माहिती सोलापूर विचार मंचने २५ जानेवारीला महापौरांना दिली. सर्व कागदपत्रे पाहून आणि पडताळणी करून महापौर श्रीकांचना यन्नम यांनी चिमणी पाडकामाबाबत आयुक्तांना २७ जानेवारी रोजी पत्र पाठविले. त्यामुळे आता पुढे काय होणार, याकडे सर्वांचे लक्ष लागले आहे.