अमरावती : संत्रा उत्पादकांना चांगला दर मिळावा याकरिता त्यावर आधारित प्रक्रिया उद्योगाची गरज आहे. ही गरज ओळखत ‘प्रहार’चे संस्थापक व आमदार बच्चू कडू हेच अशा प्रकल्पाकरिता पुढाकार घेणार आहेत. भूगाव येथे २०० हेक्‍टरवरील एमआयडीसीला विशेष मान्यता देण्यात आली आहे. याच परिसरात हा प्रकल्प उभारला जाणार आहे. 

विदर्भात सुमारे एक लाख हेक्‍टरवर संत्रा लागवड आहे. प्रक्रिया उद्योगाचा अभाव त्यासोबतच निर्यातक्षम वाणाच्या अनुषंगाने संशोधन न होणे या कारणामुळे चव आणि रंगाच्या बाबतीत वेगळेपण जपणारा नागपूरी संत्रा पंजाबमधील किन्नोशी स्पर्धेत पिछाडीवर आहे. दराच्या बाबतीतही मोठे चढउतार उत्पादकांनी गेल्या काही वर्षात अनुभवले. ही बाब लक्षात घेत संत्र्यावर आधारीत प्रक्रिया उद्योगाची गरज व्यक्‍त होत होती. कॉंग्रेस-राष्ट्रवादी कॉंग्रेस सरकारच्या काळात चुरी (छोट्या) आकाराच्या संत्र्यावरील प्रक्रिया उद्योगाला मान्यता देण्यात आली. परंतू हा  प्रकल्प नंतर नांदेडला नेण्यात आला. 

विदर्भात एक लाख हेक्‍टरवर संत्रा असताना या भागात सद्यःस्थितीत एकही प्रक्रिया उद्योग नाही. ही बाब लक्षात घेत आमदार बच्चू कडू यांनी सुमारे २५ कोटी रुपयांचा संत्र्यावर आधारीत प्रक्रिया उद्योग उभारण्यासाठी पुढाकार घेतला आहे. अचलपूर तालुक्‍यातील भूगाव येथे नुकतीच २०० हेक्‍टरवर एमआयडीसीला मान्यता मिळाली आहे. याच परिसरात हा  प्रकल्प उभारला जाणार आहे. निधी संदर्भाने मुंबईतील एका बॅंकेशी देखील चर्चा सुरू असल्याचे सांगण्यात आले.