औरंगाबाद : गतवर्षीच्या तुलनेत जिल्ह्यात रब्बी कांद्याच्या क्षेत्रात वाढ झाली आहे. गतवर्षी १६ हजार ५३९ हेक्‍टरवर असलेला कांदा यंदा १९ हजार ३७७ हेक्टरवर पोहोचला आहे. साधारणतः जिल्ह्यातील सर्वसाधारण क्षेत्राइतके दिसणारे कांदा क्षेत्र पारंपरिक पीक घेणाऱ्या तालुक्याव्यतिरिक्त इतरही तालुक्यात वाढले आहे.

औरंगाबाद जिल्ह्यात रब्बी कांद्याचे सरासरी क्षेत्र १९ हजार ९३० हेक्टर आहे. त्या तुलनेत गतवर्षी १६ हजार ५३९ हेक्‍टरवर कांदा लागवड झाली होती. या क्षेत्रात औरंगाबाद तालुक्यातील ४३० हेक्टर, पैठण ७ हजार हेक्टर, फुलंब्री ३६७ हेक्टर, वैजापूर ५२०० हेक्टर, गंगापूर २१६९ हेक्टर, खुलताबाद ६७ हेक्टर, सिल्लोड ३९ हेक्टर, सोयगाव २४ हेक्टर, तर कन्नड तालुक्यातील १२४३ हेक्टर कांदा क्षेत्राचा समावेश होता. 

गतवर्षीच्या तुलनेत यंदा औरंगाबाद, वैजापूर, खुलताबाद, सिल्लोड, सोयगाव आणि कन्नड तालुक्यात विशेषत्वाने रब्बी कांदा लागवडीचे क्षेत्र वाढले आहे. हंगामात कांद्याला मिळालेला सरासरी दर या मागचे प्रमुख कारण मानले जात आहे.

  ६८८ हेक्‍टरवर बटाटा 

यंदाच्या रब्बी हंगामात औरंगाबाद जिल्ह्यातील ६८८.८० हेक्‍टरवर बटाट्याची लागवड झाली आहे. बटाट्याचे जिल्ह्यातील सर्वसाधारण क्षेत्र ५९५ हेक्टर आहे. गतवर्षी टोमॅटोची केवळ २६.५२ हेक्टरवर लागवड झाली होती. टोमॅटोचे जिल्ह्यातील सर्वसाधारण क्षेत्र ३ हजार ७९२ हेक्‍टर आहे. प्रत्यक्षात यंदा ११८३ हेक्टरवर टोमॅटोची लागवड झाली आहे. गतवर्षी रब्बी टोमॅटोचे क्षेत्र केवळ १६५ हेक्टर होते.