परभणी : पशुसंवर्धन विभागांतर्गत राबविण्यात येत असलेल्या पशुसंजीवनी योजनेअंतर्गत परभणी जिल्ह्यातील दुधाळ जनावरांना आधार क्रमांक दिला जात आहे. मंगळवारअखेर (ता. २०) या योजनेअंतर्गत गायी, म्हशी मिळून एकूण १३ हजार ७२५ दुधाळ जनावरांना इअर टॅगिंग करण्यात आले आहे, अशी माहिती पशुसंर्वधन विभागाच्या सूत्रांनी दिली.

१९ व्या पशुगणनेनुसार जिल्ह्यात २२८० विदेशी गायी, ५३,३३६ देशी गावरान गायी, ३४,२२८ म्हशी अशी एकूण ८९ हजार ८४४ दुधाळ जनावरे आहेत. यामध्ये परभणी तालुक्यातील १६,५७८, जिंतूर तालुक्यातील १७,५९९, सेलू तालुक्यातील ६९३९, मानवत तालुक्यातील ५५५३, पाथरी तालुक्यातील ६२०७, सोनपेठ तालुक्यातील ४३५१, गंगाखेड तालुक्यातील १२,१४६, पालम तालुक्यातील ८६१८, पूर्णा तालुक्यातील ११ हजार ८५३ जनावरांचा समावेश आहे.

या जनावरांना आधार क्रमांक देण्यासाठी एकूण ३७ हजार ४०० इअर टॅग प्राप्त झाले आहेत. आजवर परभणी तालुक्यातील २ हजार १५, जिंतूर तालुक्यातील ३७४७, सेलू तालुक्यातील ९१९, मानवत तालुक्यातील १७०९, पाथरी तालुक्यातील ४३१, सोनपेठ तालुक्यातील १२४१, गंगाखेड तालुक्यातील १७२१, पालम तालुक्यातील ६९१, पूर्णा तालुक्यातील १२५१ अशा एकूण १३ हजार ७२५ जनावरांना इअर टॅग लावण्यात आले आहेत. त्यापैकी ५ हजार ७७२ जनावरांची आॅनलाइन नोंदणी करण्यात आली आहे.

दुधाळ जनावरांना आधार क्रमांक दिल्यामुळे शासनाच्या दुग्धोत्पादन वाढीसाठीच्या योजना राबविण्यासाठी डाटा उपलब्ध होणार आहे. याशिवाय जनावराच्या खरेदी-विक्रीचे व्यवहार करण्यासाठीदेखील आधार क्रमांक उपयुक्त ठरणार आहे, असे सूत्रांनी सांगितले.