पाटण, जि. सातारा :  कोयना प्रकल्पग्रस्तांनी सुरू केलेल्या आंदोलनाचा आजचा 18वा दिवसही आंदोलनाबाबतचा ठाम निर्धार दर्शविणारा ठरला. रविवारी (ता. 18) पाडव्याची गुढी उभारून सोमवारी मुंबईकडे लॉंग मार्चला सुरवात करण्याच्या उद्देशाने प्रकल्पग्रस्तांनी बुधवारपासून नियोजनास प्रारंभ केला आहे.

कोयनानगर येथील शिवाजी महाराज क्रीडांगणावर 26 फेब्रुवारीपासून कोयना प्रकल्पग्रस्त विविध मागण्यांसाठी श्रमिक मुक्ती दलाचे अध्यक्ष डॉ. भारत पाटणकर यांच्या नेतृत्वाखाली ठिय्या आंदोलनास बसले आहेत. श्री. पाटणकर यांनी शनिवारपर्यंत मुख्यमंत्र्यांसोबत बैठक नाही झाली, तर रविवारी आंदोलनस्थळी गुढी उभारून सोमवारी प्रकल्पग्रस्त मुंबईकडे लॉंग मार्चसाठी आगेकूच करतील, असे जाहीर केले आहे.

बुधवारी (ता. 14) आंदोलनस्थळी डॉ. पाटणकर यांनी आंदोलनाच्या नियोजनाबाबत प्रकल्पग्रस्तांशी चर्चा केली. सोमवारी पाटण, कऱ्हाड, जावळी व महाबळेश्‍वर तालुक्‍यांतील प्रकल्पग्रस्त कुटुंबांतील सर्व सदस्यांसह सहभागी होतील व पुढील प्रवासात राज्यात विखुरलेले प्रकल्पग्रस्त सहभागी होऊन आंदोलनाची व्याप्ती वाढवतील, असे सांगितले. या वेळी चैतन्य दळवी, हरिश्‍चंद्र दळवी, बळिराम कदम, संजय लाड, शैलेश सपकाळ, दत्ता देशमुख, महेश शेलार, दीपक साळवींसह प्रकल्पग्रस्त उपस्थित होते.