बुलडाणा  : शेतकऱ्यांचे लक्ष वेधणारी अाणि गेल्या तीनशे वर्षांपेक्षा अधिक काळापासून सुरू असलेली भेंडवळची प्रसिद्ध घटमांडणी बुधवारी (ता. १८) होऊ घातली अाहे. गुरुवारी (ता. १९) सूर्योदयी या मांडणीचे अंदाज वर्तविले जाणार आहेत.

जळगाव जामोद तालुक्यातील भेंडवळ या गावात दरवर्षी अक्षय तृतीयेला घटमांडणी केली जाते. या घटमांडणीत प्रामुख्याने पाऊस, पीक परिस्थिती, उत्पादन, भाव, देशाची राजकीय स्थिती याबाबत प्रामुख्याने व्यक्त होणाऱ्या अंदाजाकडे सर्वांच्या नजरा खिळलेल्या असतात. 

जळगाव जामोद तालुक्‍यातील भेंडवळ येथे साडेतीनशे वर्षांपूर्वी चंद्रभान महाराज वाघ यांनी भेंडवळ घटमांडणी सुरू केल्याचे सांगितले जाते. अाता त्यांचे १५ वे वंशज सारंगधर महाराज व पुंजाजी महाराज हे घटमांडणी करतात. बुधवारी सायंकाळी भेंडवळ गावाला लागूनच असलेल्या शेतात ही घटमांडणी केली जाईल. मागील वर्षी अतिवृष्टीच्या आपत्तींसह पीक परिस्थिती सर्वसाधारण राहणार असल्याचा अंदाज देण्यात अाला होता.

तसेच देशाचा राजा अर्थात पंतप्रधान कायम राहणार असला, तरी देशासमोरील आर्थिक संकटांची टांगती तलवार कायम राहील असेही सांगण्यात अाले होते. यावर्षी होणाऱ्या घटमांडणी व त्यानंतर अंदाज याकडे शेतकऱ्यांच्या नजरा लागलेल्या अाहेत.