नगर ः येथील सावेडीतील जागिंग पार्क मैदानावर सुरु असलेल्या ‘सकाळ-अॅग्रोवन’ कृषी प्रदर्शनाचा रविवारी (ता. २५) उत्साहात समारोप झाला. या कृषी प्रदर्शनात नगर शहर, जिल्ह्यासह शेजारच्या जिल्ह्यांमधील शेतकऱ्यांनी सहभाग नोंदवत नवीन तंत्रज्ञानाची माहिती जाणून घेतली. 

 

नगर येथे आयोजित सकाळ-अॅग्रोवन कृषी प्रदर्शनाचे चितळे जिनस एबीएस (इंडिया) सहप्रायोजक होते. या तीनदिवसीय प्रदर्शनात विविध ५० स्टॉल्स होते. 

ट्रॅक्‍टर्स, हार्वेस्टिंग यंत्रे, विविध अवजारे, कापणी यंत्रे, जैविक कीडनाशके, विद्राव्य खते, ग्रीन हाउस टेक्‍नॉलॉजी, पॉलिहाउस, ठिबक तुषार संच, कृषी साहित्य प्रकाशन, रोपवाटिका, प्रक्रिया उद्योग, खते, अत्याधुनिक कडबाकुट्टी आदी स्टॉलचा यात समावेश होता.

 

चितळे दूधतर्फे मुक्‍त संचार गोठा व मुरघास निर्मिती, दुधाळ जनावराच्या प्रजाती, सेंद्रिय शेतीची गरज, मार्केटिंग व ब्रॅंडिंग व्यवस्थापन आदी महत्त्वपूर्ण विषयावर शेतकऱ्यांना माहिती देण्यात आली.

 

शेळीपालन, दुग्ध व्यवसाय, डाळिंब निर्यात, किफायतशीर ऊस उत्पादन या विषयावर शेतकऱ्यांना मार्गदर्शन करण्यात आले. प्रदर्शनाला नगर, औरंगाबाद, बीड, सोलापूर, उस्मानाबाद भागांतील शेतकऱ्यांनी भेटी दिल्या. रविवारी प्रदर्शनाचा समारोप झाला.