पुणे  ः गेल्या वर्षीचा खरीप पीकविमा न मिळालेले बीड जिल्ह्यातील शेतकरी येथील दी ओरिएंटल इन्शुरन्स कंपनीच्या कार्यालयासमोर गेल्या तीन दिवसांपासून मुक्काम सत्याग्रह आंदोलन करीत आहेत. जोपर्यंत पीकविमा मिळणार नाही तोपर्यंत आम्ही येथून उठणार नाही, असा शेतकऱ्यांचा पवित्रा कायम आहे. कंपनीच्या वेळकाढू धोरणामुळे शेतकऱ्यांच्या संतापात भर पडत असून, आंदोलनाची तीव्रता वाढत आहे.

सध्या जनावरे, घरदार वाऱ्यांवर सोडून रब्बी पेरणीचा, कापूस वेचणीचा हंगाम असतानाही जवळ पैसा नसल्याने पुण्यातील ओरिएंटल इन्शुरन्स कंपनीचे दार सोडण्यास शेतकरी तयार नाहीत. शेतकऱ्यांच्या विमा कंपनीसोबत आज झालेल्या चर्चेत समाधानकारक निष्कर्ष निघाला नाही. या चर्चेत कंपनीच्या क्षेत्रीय कार्यालयाचे प्रमुख पी. एस. मूर्ती यांनी शेतकऱ्यांना पीकविमा देणे हे कायदेशीररीत्या बंधकारक आहे, असे मान्य केले. परंतु, अद्याप बीड जिल्ह्यातील चाळीस शेतकऱ्यांना खरीप हंगाम २०१८ मधील विमा देण्यात आला नाही. या आंदोलनास विविध संघटनांचा पाठिंबा मिळत आहे. शेतकऱ्यांच्या प्रश्नी विमा कंपनी अशीच असंवेदनशील वागत असल्यास आंदोलन आणखी तीव्र करण्याचा इशारा बीड जिल्हा किसान सभेचे ॲड. अजय बुरांडे यांनी दिला आहे.