नांदेड : ‘‘जिल्ह्यासह संपूर्ण मराठवाड्यात झालेल्या अतिवृष्टीमुळे हाताशी आलेल्या खरीप पिकांचे मोठ्या प्रमाणात नुकसान झाले. या संकटातून शेतकऱ्यांना बाहेर काढायचे असेल, तर तुटपुंजी नुकसान भरपाई देऊन भागणार नाही. शेतकऱ्यांच्या हक्काचा पीकविमा व भरीव नुकसानभरपाई दसऱ्यापुर्वी मंजूर करा; अन्यथा दसऱ्यानंतर मोठे आंदोलन छेडले जाईल,’’ असा इशारा शेतकरी-कष्टकरी संघर्ष समितीचे निमंत्रक कैलास येसगे - कावळगावकर यांनी दिला.

जिल्ह्यात मोठ्या प्रमाणात नुकसान होऊनही फक्त पंचनामे अन् दौऱ्यांचे सोपस्कार पूर्ण करण्यातच शासन व प्रशासन धन्यता मानत आहेत. आता दौरे बंद करून शेतकऱ्यांना भरीव मदत देणे अत्यंत गरजेचे आहे. रब्बीची पेरणी व दसरा-दिवाळीसारखे महत्वपूर्ण सण कसे साजरे करायचे, हा प्रश्न शेतकऱ्यांसमोर आहे. म्हणून समितीच्या वतीने जिल्हाधिकाऱ्यांकडे निवेदन देण्यात आले. 

निवेदनानुसार एनडीआरएफ, एसडीआरएफचे निकष बदलून शेतकऱ्यांना भरीव आर्थिक मदत द्यावी, संपूर्ण जोखीम रक्कमेचा पीकविमा द्यावा, असे आदेश विमा कंपन्यांना द्यावे, कर्जमाफीची प्रलंबित प्रकरणे तत्काळ मार्गी लावून गरजू शेतकऱ्यांना नवीन पीककर्ज द्या आदी प्रमुख मागण्या करण्यात आल्या.

दसऱ्याच्या पुर्वी शासनाने योग्य निर्णय नाही घेतला, तर शेतकऱ्यांच्या वतीने सिमोल्लंघन केले जाईल. या प्रसंगी समितीचे निमंत्रक कैलास येसगे, कॉ. गंगाधर गायकवाड, प्रबुद्ध चित्ते, प्रा. इरवंत सुर्यकार, प्रा. डॉ. प्रकाश हिवराळे, कॉ. अंकूश माचेवाड, दिलीप पाटील, प्रविण महाराज इनामदार, गजानन पाटील, सुभाष जाधव उपस्थित होते.