शेंबाळपिंपरी, यवतमाळ  : विदर्भ-मराठवाडा सीमेवरील पैनगंगा नदीवरील इसापूर धरणात गुरुवारी (ता.३०) ६५.१८ टक्के जलसाठा संचयित झाला. पाणलोट क्षेत्रातील दमदार पावसामुळे विदर्भ-मराठवाड्यातील सव्वा लाख हेक्‍टरवरील रब्बी हंगामाच्या सिंचनाचा मार्ग मोकळा झाला आहे. त्यामुळे परिसरातील कास्तकारांमधून समाधान व्यक्त केले जात आहे.

इसापूर धरणाला ६६.१८ टक्के पाणीपातळी गाठण्यासाठी तब्बल चार वर्षे प्रतीक्षा करावी लागली. गेल्या सहा वर्षांपासून इसापूर धरणात प्रथमच पाण्याचा बंपर स्टॉक झाला आहे. धरणाची एकूण पाणी क्षमता ४४१ मीटर असून, सध्यस्थितीत ४३७.५७ मीटर जलसाठा झाला आहे.

सिरसम, खंडाळा, अनसिंग, गोरेगाव, गोवर्धन, शिरपूर, डोणगाव, सारखेडा, वाशीम, रिसोड, मेहकर या परिसरात समाधानकारक पर्जन्यमान झाले. त्यामुळे विदर्भ व मराठवाड्यातील एक लाख २५ हजार ४९० हेक्‍टर शेतजमिनाचा रब्बी हंगामासाठी सिंचनाचा मार्ग मोकळा झाला आहे. धरणाच्या पाण्यातून विदर्भातील ८४ किलोमीटर लांबीच्या डाव्या कालव्याद्वारे यवतमाळ जिल्ह्यातील १९ हजार ३२० हेक्‍टर जमीन सिंचनाखाली येते, तर ११७ किलोमीटर लांबीच्या उजव्या कालव्याद्वारे मराठवाड्यातील नांदेड जिल्ह्याचा ९२ हजार २१० हेक्‍टर आणि हिंगोली जिल्ह्याचा १३ हजार ९६० हेक्‍टर शेतजमिनीचा भाग सिंचनाखाली येतो. मागील वर्षी या महिन्यात धरणात फक्त १४ टक्के जलसाठा झाला होता.