पुणे : शेतकऱ्यांची गैरसोय दूर करण्यासाठी डिजिटल सात-बारा उपक्रमाबाबत महसूल विभागाशी करार करणाऱ्या बॅंकाची संख्या आता ५१ झाली आहे. फेरफार व खाते उतारे बँकांना ऑनलाइन उपलब्ध होण्यासाठी महसूल विभागाने सुरू केलेले बँक पोर्टल आता लोकप्रिय होत आहे. राज्यात सध्या विविध बँकांच्या साडेसहा हजारांपेक्षा जास्त शाखांना या उपक्रमाचा फायदा होत आहे. 

डिजिटल सात-बारा उपक्रमातून मुख्यत्वे शेतकरी वर्गाला पीककर्ज वितरणात सुलभता यावी या उद्देशाने बँकांसोबत महसूल विभागाने चांगला समन्वय ठेवला आहे. सध्या या उपक्रमासाठी https://g२b.mahabhumi.gov.in/banking_application/ वेब पोर्टल विकसित केले जात आहे. 

जमाबंदी आयुक्तालयाच्या ई -फेरफार प्रकल्प राज्य समन्वयक उपजिल्हाधिकारी रामदास जगताप यांच्याकडून या पोर्टलवर जास्तीत जास्त बॅंकांचा लाभ घेण्यासाठी पाठपुरावा सुरू केला आहे. त्यामुळे ९ जूनअखेर राज्यातील ५१ बँकांशी संस्थांनी सामंजस्य करार झाले आहेत. 

सहा लाख ९० हजार कागदपत्रे ऑनलाइन  शासनाशी करार झालेल्या बॅंका आता डिजिटल स्वाक्षरीत सातबारा उतारे, खाते उतारे व फेरफार माहिती ऑनलाइन पद्धतीने उपलब्ध करून घेत आहेत. या बॅंकांनी शेतकऱ्यांशी संबंधित आतापर्यंत सहा लाख ९० हजार कागदपत्रे ऑनलाइन उपलब्ध करून घेतली आहेत.  जिल्हा बॅंकांचा सहभाग  या उपक्रमात सहभागी होण्यासाठी बॅंकांना जमाबंदी आयुक्तालयासोबत करार करावा लागतो. विशेष म्हणजे राज्यातील जिल्हा मध्यवर्ती बॅंका यात वेगाने सहभागी होत आहेत. आतापर्यंत सातारा, पुणे, गोंदिया, रत्नागिरी, सिंधुदुर्ग, औरंगाबाद, धुळे, बुलडाणा, परभणी, सांगली, ठाणे, सोलापूर, नाशिक, कोल्हापूर, बीड, यवतमाळ या जिल्हा बॅंकांचा समावेश आहे.