कोल्हापूर  : नागरिकांची रोगप्रतिकारक शक्ती वाढावी यासाठी ग्रामविकास विभागामार्फत राज्यात आर्सेनिक अल्बम-३० हे होमिओपॅथिक औषध मोफत पुरवणार असल्याचे ग्रामविकास मंत्री हसन मुश्रीफ यांनी सांगितले.

मंत्री श्री. मुश्रीफ कागलमध्ये आयोजित पत्रकार परिषदेत बोलत होते. ते म्हणाले, की कोरोना विषाणूविरुद्ध लढण्यासाठी आर्सेनिक अल्बम -३० हे औषध मानवी शरीरात रोगप्रतिकारक शक्ती निर्माण करते आणि ती वाढविते, असे निदर्शनास आले आहे. राज्य सरकारच्यावतीने या औषधाच्या वाटपासाठी केंद्र सरकारच्या आयुष्य मंत्रालयाकडे परवानगी मागितली होती, त्याला मंजुरीही मिळाली आहे. आयुष मंत्रालयाच्या निर्देशानुसार या औषधांचे वाटप केले जाणार आहे.

सध्या राज्याच्या ग्रामविकास विभागाच्यावतीने राज्यभरात प्राथमिक माहिती जमा करण्याचे काम सुरू आहे. त्यामध्ये जिल्हानिहाय ग्रामपंचायती, कुटुंबांची संख्या व नागरिकांची आकडेवारी संकलित करण्याचे काम सुरू आहे. पुढील आठवड्यात महाराष्ट्रातील प्रत्येक जिल्ह्यातील गावागावांत व प्रत्येक घरातील प्रत्येक माणसापर्यंत हे औषध पोहोचवले जाईल.