जगभरातील कोबीवर्गीय वनस्पतीमध्ये रोगांच्या प्रादुर्भावाला प्रतीकारक करणाऱ्या जनुकांचा शोध घेण्यात आंतरराष्ट्रीय संशोधक गटाला यश आले आहे. त्यामुळे भविष्यात पांढरा तांबेरा रोगासाठी प्रतीकारक जनुकीय सुधारित जातींचा विकास शक्य होणार आहे. कोबीवर्गीय पिकांमध्ये अनेक प्रकार असून, त्यांची लागवड जगभरामध्ये होते. त्यांचे कुळ ब्रासिसिई असे असून, त्यातत फूलकोबी, ब्रोकोली, कोबी यांच्यासोबतच मोहरीचाही समावेश होतो. या सर्व पिकांमध्ये व्हाइट रस्ट (पांढरा तांबेरा) प्रामुख्याने आढळून येतो. हा रोग अल्बुगो कॅण्डीडा या सूक्ष्मजीवामुळे होतो. हा सूक्ष्मजीव बुरशीप्रमाणे कार्य करीत असला, तरी बुरशी नाही. वाढीसाठी योग्य आर्द्रता आणि तापमान मिळताच पिकांवर प्रादुर्भाव करून पोषक अन्नद्रव्यांचा फडशा पाडतो.

संशोधनाला चालना ः कोर्डोबा विद्यापीठातील जनुकशास्त्राचे प्रो. अॅन्टोनियो डी पियेत्रो यांच्या मार्गदर्शनाखाली संशोधन कार्य सुरू आहे. त्यासाठी युरोपियन महासंघाच्या मारी स्क्लोडोवस्का- क्युरी अॅक्शन प्रोग्रॅम अंतर्गत आर्थिक साह्य उपलब्ध करण्यात आले आहे. टोमॅटो, केळीसह शेकडो पिकांमध्ये प्रादुर्भाव कऱणाऱ्या फ्युजारियम ऑक्सिस्पोरम या बुरशीच्या प्रादुर्भाव करण्याच्या यंत्रणेचा प्रामुख्याने अभ्यास केला जात आहे. अशा सूक्ष्मजीवांमुळे होणारे पिकांचे संरक्षण करून होणारे नुकसान रोखण्यासाठी या प्रकल्पामध्ये काम सुरू आहे.