पारोळा, जि. जळगाव : तालुक्यात मागील काही दिवसांपूर्वी महाराष्ट्र ग्रामीण रोजगार हमी योजनेअंतर्गत वैयक्तिक वृक्षलागवडीच्या १ हजार ६७ शेतकऱ्यांची वर्कऑर्डर निघाली असून, या कामांचे मस्टर काही दिवसांपूर्वी झिरो करण्यात येऊन नवीन कामे थांबविण्यात आली होती. ते काम पुन्हा सुरू व्हावे, यासाठी स्वाभिमानी शेतकरी संघटनेसह तालुक्यातील सरपंचांनी मंगळवारी (ता.२३) पंचायत समिती आवारासमोर ठिय्या आंदोलन केले होते.  या आंदोलनाची आमदार चिमणराव पाटील व माजी पालकमंत्री डॉ. सतीश पाटील यांनी दखल घेत संबंधित काम सुरू करण्यासंदर्भात मुख्य कार्यकारी अधिकारी यांच्याशी भ्रमणध्वनीवर चर्चा करून गटविकास अधिकारी यांना सूचना करीत काम सुरू करण्याचे सांगितले. त्यामुळे बऱ्याच दिवसांपासून प्रलंबित असलेल्या वैयक्तिक वृक्ष लागवड कामाला सुरुवात होणार असल्याने शेतकऱ्यांनी याबाबत आनंद व्यक्त केला.  न्याय मिळावा हीच भूमिका : चिमणराव पाटील  तालुक्यात वृक्ष लागवड योजना पूर्ववत सुरू करण्यासाठी आपण मुख्य कार्यकारी अधिकारी यांच्याशी भ्रमणध्वनीवर चर्चा करून योजना पूर्ववत सुरू करण्याचे गटविकास अधिकारी यांना सूचित केले आहे.