सोलापूर ः कुमठे येथील श्री सिद्धेश्‍वर सहकारी साखर कारखान्याची चिमणी पाडण्याचा प्रशासनाने घेतलेला निर्णय मागे घ्यावा, अन्यथा आम्ही जिल्हाधिकारी कार्यालयासमोर आत्मदहन करू, असा इशारा ऊसतोडणी मजूर व वाहतूकदारांनी निवेदनाद्वारे जिल्हाधिकारी व महापालिका आयुक्तांना दिला आहे. 

ऊसतोड मजूर व वाहतूकदार संघटनेने जिल्हाधिकारी मिलिंद शंभरकर यांना भेटून यासंबंधी निवेदन दिले. कारखान्याची चिमणी पाडल्यानंतर शेतकरी सभासद, कामगार, मजूर, वाहतूकदार यांच्यासह प्रत्यक्ष व अप्रत्यक्ष अशा लाखो लोकांच्या उदरनिर्वाहाचा प्रश्‍न निर्माण होणार असल्याचे या निवेदनात म्हटले आहे. ऊस उत्पादक शेतकऱ्यांच्या शेतातील ऊस कारखान्यापर्यंत नेण्यासाठी कारखान्याने ९०० हून अधिक ट्रॅक्टर व ट्रकचालकांशी करार केला आहे. कारखान्याकडून अनामत रक्कम घेऊन ऊसतोडणी मजुरांना २२ कोटी रुपयांचे वाटप केले आहे, अशा परिस्थितीत कारखान्याची चिमणी पाडल्यास कारखाना बंद पडून ऊसतोड वाहतूकधारक आर्थिक अडचणीत येतील. ऊसतोड मजूर गावी परतल्यास त्यांना आगाऊ दिलेली रक्कम वसूल होणार नाही. तरी सर्व वाहतूकदारांचे मोठे आर्थिक नुकसान टाळावे, यासाठी ही कारवाई थांबवावी, असेही त्यात म्हटले आहे. या वेळी म्हांतेश हत्तुरे, शिवराया बिराजदार, अशोक बिराजदार, लक्ष्मण झळकी, रामगोंडा बिराजदार, लक्ष्मण बिराजदार, सुरेश बिराजदार, संगमेश मैंदर्गी उपस्थित होते.  नुकसानभरपाई द्या, अन्यथा हंगामानंतर पाडा  दोन वर्षांपासून कोरोनाच्या प्रादुर्भावामुळे लॉकडाऊनमध्ये वाहतूक व्यवसाय ठप्प राहिल्याने बँकांकडून घेतलेल्या कर्जांची परतफेडही करता आली नाही. अशा अडचणीच्या काळात चिमणीचे पाडकाम केल्यास वाहतूकदारांच्या अडचणीत आणखी भर पडणार आहे. चिमणी पाडण्यासाठी कारखाना बंद करण्याअगोदर ऊसतोड मजूर व वाहतूकदारांना प्रशासनाने नुकसान भरपाई द्यावी. अन्यथा, गाळप संपेपर्यंत चिमणीचे पाडकाम करू नये, अशी मागणीही त्यात करण्यात आली आहे.