Cotton Market News : जळगाव ः खानदेशात भारतीय कापूस महामंडळाने (Cotton Corporation Of India) (सीसीआय) खुल्या बाजारातील कापूस खरेदी (Cotton Procurement) डिसेंबरमध्ये काही दिवस सुरू केली. परंतु खुल्या बाजारातील ही खरेदी मागील दीड महिन्यापासून बंदावस्थेत आहे.

खरेदीला प्रतिसाद मिळत नाही, असे कारण सांगून सीसीआयने खरेदी बंद केली. परंतु बाजारात व्यापारी, खासगी खरेदीदार शेतकऱ्यांची पिळवणूक करीत आहेत. या स्थितीत सीसीआयनेदेखील खुल्या बाजारात येऊन कापूस खरेदी सुरू करण्याची मागणी शेतकऱ्यांनी केली आहे.

सीसीआयने खानदेशात नंदुरबार येथे सर्वप्रथम खरेदी केंद्र सुरू केले होते. परंतु या काळात कापूस दरांवर दबाव वाढत गेला. यामुळे सीसीआयने कापूस दर कमी केले. यामुळे शेतकऱ्यांनी सीसीआयच्या खरेदी केंद्रात कापूस विक्री टाळली.

सध्या शासन कुठेही खरेदी करीत नसल्याचा लाभ व्यापारी, खासगी खरेदीदार घेत आहेत. कापसाची कवडीमोल दरात खरेदीचा प्रयत्न ही मंडळी गावोगावी करीत आहे. सीसीआयने खरेदी सुरू केल्यास दर स्थिर राहतील.

सध्या खासगी खरेदीदार ७८०० ते ८१०० रुपये प्रतिक्विंटल या दरात खरेदी करीत आहेत. सीसीआयने खरेदी सुरू केल्यास स्पर्धा तयार होईल. बाजारात पोकळी तयार होईल. यामुळे दर स्थिर राहतील, किंवा सुधारणादेखील दरात होवू शकते, अशा स्थितीत सीसीआयने खुल्या बाजारात येवून कापूस खरेदी सुरू करण्याची मागणी शेतकरी करीत आहेत.