Amaravati News : सोयाबीनचा हंगाम सुरू झाला असून, स्थानिक बाजार समितीत दररोज १५ हजार पोत्यांची आवक नोंदविण्यात येत आहे. हमीदराने सोयाबीन खरेदीचे शेतकऱ्यांचे स्वप्न मात्र खुल्या बाजारात मिळणाऱ्या दरांमुळे मृगजळ ठरू लागले आहे. सध्या सोयाबीनला सरासरी चार हजार रुपये इतकाच दर मिळू लागला आहे.

खरीप काढणीचा हंगाम अंतिम टप्प्यात आहे. यामुळे दररोज बाजार समितीमध्ये दहा ते पंधरा हजार पोत्यांची आवक आहे. यंदा चांगला भाव मिळेल ही आशा बाजारातील दर बघता फोल ठरली आहे.

शुक्रवारी (ता.१४) येथील बाजार समितीत १४ हजार ४९५ पोत्यांची आवक नोंदविण्यात आली. या सोयाबीनला ३८५० ते ४१९६ रुपये भाव मिळाला. सरासरी ४ हजार २३ रुपये हा दर राहिला आहे. ७ ऑक्टोबरपासून १६ नोव्हेंबरपर्यंत २ लाख ८७ हजार क्विंटल सोयाबीनची आवक अमरावती बाजार समितीत नोंदविण्यात आली आहे.

राज्य सरकारने सप्टेंबरमध्ये निर्णय घेत हमीभावाने १३ लाख टन सोयाबीन खरेदी करण्याची घोषणा केली. मात्र येथील नाफेडच्या केंद्रावर आतापर्यंत ८० शेतकऱ्यांचे १ हजार ७३१ क्विंटल सोयाबीन या केंद्रांवर खरेदी झाले आहे. खुल्या बाजारात यापेक्षा अधिक सोयाबीनची आवक होत आहे.

नाफेडला केवळ एफएक्यू दर्जाचाच सोयाबीन हवा असल्याने नोंदणी केलेल्या शेतकऱ्यांना त्यांचे सोयाबीन या दर्जाचे नसल्याचे कारण देत परत पाठविण्यात येत आहे. त्यामुळे या शेतकऱ्यांना नाइलाजाने खुल्या बाजारात पडत्या दराने सोयाबीन विक्रीची वेळ आली आहे.

हमीभावाने खरेदीस खूपच मर्यादा असल्याने शेतकऱ्यांचा खुल्या बाजाराकडे ओढा आहे. सुगी सुरू झाल्यापासून आतापर्यंत शेकडो शेतकऱ्यांनी सुमारे एक लाख क्विंटलवर सोयाबीनची बाजारात आणले, मात्र त्यांना हमीभावा इतका दर न मिळाल्याने यंदाही आर्थिक नुकसानीस सामोरे जावे लागले.