Akola News : बाजारात सध्या सोयाबीनच्या दरात कुठल्याही सुधारणेची शक्यता नसल्याचे पाहून शेतकरी सोयाबीन विक्रीला काढू लागले आहेत. यामुळेच आता दररोज आवक सुमारे पाच हजार क्विंटलपेक्षा अधिक होत आहे. मागील चार दिवसांत सुमारे २० हजार क्विंटलपेक्षा अधिक आवक झाली आहे.

येथील कृषी उत्पन्न बाजार समितीत शुक्रवारी (ता. २९) सोयाबीनची ५१०२ क्विंटलची आवक झाली होती. सध्या सोयाबीनचा किमान दर ३५७५, तर कमाल दर ४४५० रुपये एवढा होता. ४१०० रुपये सरासरी दर मिळाला. सोयाबीनच्या दरात गेल्या काही महिन्यांपासून स्थिरता आलेली आहे.

उलट मध्यंतरी किमान दर तीन हजारांच्या आत पोहोचला होता. आता सोयाबीन चांगल्या दर्जाचे येत असल्याने किमान दर ३५०० रुपयांवर गेला आहे. कमाल दरानेही ४४०० रुपयांचा पल्ला गाठला. मुळात हाही दर कमीच असल्याचे शेतकरी बोलत आहेत. परंतु बाजारात सध्या सोयाबीनच्या दरात कुठल्याही सुधारणेची शक्यता नसल्याने आजवर प्रतीक्षेत असलेल्या शेतकऱ्यांनी सोयाबीनची विक्री सुरू केली.

शिवाय गेल्या आठवड्यापर्यंत निवडणूक रणधुमाळी सुरू राहल्यानेही आवकेवर परिणाम झालेला होता. आता मागील काही दिवसांत येथील बाजार समितीत दररोज साडेचार हजार ते पाच हजार क्विंटलपर्यंत आवक होत असल्याचे दिसून येत आहे.

कापूस सरासरी ७३९६ रुपये

अकोला बाजार समितीने दिलेल्या माहितीनुसार खरेदी केंद्रावर कापसाच्या आवकेतही सुधारणा होऊ लागली आहे. शुक्रवारी (ता. २९) बाजारात २०९५ क्विंटलची आवक नोंदविण्यात आली. कापसाला किमान दर ७३३१ रुपये आणि कमाल ७४७१ रुपयांचा भाव मिळाला. सरासरी ७३९६ रुपये दराने खरेदी व्यवहार झाला.

सोयाबीनची मागील चार दिवसांतील आवक
तारीख आवक (क्विंटल)
२६ नोव्हेंबर ४९६०
२७ नोव्हेंबर ५७३२
२८ नोव्हेंबर ५३१९
२९ नोव्हेंबर ५१०२