Sindhudurg News: सिंधुदुर्ग जिल्ह्यात काजू हंगामाला धीम्यागतीने सुरुवात झाली असून काजू बीच्या दरासोबत आता ओल्या काजू गराला देखील चांगला दर मिळत आहे. ओल्या काजू गराला प्रतिकिलो १ हजार ४०० तर कच्च्या बीला शेकडा दोनशे रुपये दर मिळत आहे.

काजू हंगाम यावर्षी महिना दीड महिन्यांनी सुरू झाला. अजूनही काही भागातच काजू बी परिपक्व व्हायला सुरुवात झाली आहे. त्यामुळे काजू बीला प्रतिकिलो १७० ते १८० रुपये दर मिळत आहे.

मात्र सध्या काजू उत्पादक ओल्या काजू आणि काजूगर विक्री करीत आहेत. ओला काजूगर प्रतिकिलो १ हजार ४०० रुपये तर शेकडा ३५० रुपयांनी विक्री करीत आहेत. तर ओली काजू बी शेकडा २०० रुपयांनी विक्री करीत आहेत.

जिल्ह्यातील सर्व स्थानिक बाजारपेठांमध्ये काजूगर आणि काजू बी विक्रीसाठी आलेली दिसत आहे. ओल्या काजूगराला मुंबई, पुणे, कोल्हापूर यासह स्थानिक बाजारपेठेत मोठी मागणी आहे. ओला काजू बी फोडून घेण्यासाठी महिलांना शेकडा ५० रुपये दिले जातात.