Nagar News : उन्हाळ्यात दुध आणि दुग्धजन्य पदार्थाला चांगली मागणी असतानाही दुधाच्या दरात कपात केली जात आहे. गेल्या २० दिवसांत गाईच्या दुधात सुमारे चार रुपयांनी घट झाली आहे. गेल्या सहा महिन्यांपासून टिकून असलेला गाईच्या दुधाचा ३८ रुपयांचा दर घसरून ३४ रुपयांवर आला आहे.
देशांतर्गत दूध पावडर व बटरचे दर कमी झाल्याचे सांगत दुधाच्या दरात कपात केल्याचे सांगितले जात आहे. अजून दरात कपात होण्याची शक्यता एका दूधसंकलन केंद्र चालकाने व्यक्त केली. दुधाच्या दरात कपात होत असल्याने दूध उत्पादक मात्र हतबल झाले आहेत.
दूध, बटरच्या दरावर दूध व्यवसाय अवलंबून आहे. एकेकाळी शाश्वत असलेला दूध व्यवसाय गेल्या सहा-सात वर्षांपासून सातत्याने अस्थिर होत आहे.
कोरोना संकटाच्या काळात दुधाची व दुग्धजन्य पदार्थांची मागणी कमी झाल्याने दुधाचे दर कमी झाले होते. १६ ते १७ रुपये प्रतिलिटर दराने खरेदी केली जात होती. त्यानंतर दोन वर्षांत हळूहळू दूधदरात वाढ झाली.
मात्र त्या आधीही दूध दरासाठी राज्यात आंदोलन करून संप करावा लागला होता. दुधाचे दर सातत्याने अस्थिर ठेवून दूध उत्पादकांना अडचणीत आणले जात असल्याचा आरोप सातत्याने होत आहे.
राज्यात साधारण ७० सहकारी व ३०० पेक्षा खासगी दूध संघाद्वारे दोन ते सव्वादोन कोटी लिटर दुधाचे संकलन होते. त्यातील ४० टक्के दुधाची पावडर, बटर व अन्य दुग्धजन्य पदार्थ तयार होतात. तर ६० टक्के दूध ग्राहकांना पाउचमधून विकले जाते.
शिवाय राज्यात २५ लाख लिटरच्या जवळपास दुधाची थेट ग्राहकांना विक्री केली जात आहे. थेट विक्री केले जाणारे दूध हे म्हशीचे असल्याचे सांगितले जात आहे.
गेल्या अनेक वर्षानंतर यंदा साधारण चार ते पाच महिन्यांपासून दुधाचे दर वाढले. पशुखाद्य व अन्य बाबींचा विचार केला तर सध्या मिळणारे दुधाचे दर बरे आहेत, असे सांगत दूध उत्पादक काहीसे समाधानी होते. मात्र, गेल्या काही दिवसांपासून दूध दरात पुन्हा कपात सुरु झाली आहे.
थोडक्यात महत्त्वाचे...
- गेल्या तीन महिन्यांपासून दुधाला प्रतिलिटर ३८ रुपये दर मिळाले.
- परिणामी, सात ते दहा टक्के दूध उत्पादन वाढले
- गेल्या काही दिवसांपासून दर कपात सुरू
- दूध व दुग्धजन्य पदार्थांना वाढती मागणी. शिवाय, उन्हामुळे साधारण १० टक्के दूध उत्पादनात घट. तरीही दर कमी. त्यामुळे शेतकऱ्यांसमोर दुहेरी संकट
- दूध खरेदी धोरण पावडर, बटर खरेदीवर अवलंबून. सरकारकडून त्यांच्या आयातीची चर्चा. त्यामुळे पावडर, बटरसह दुधाचे दर कमी.
पशुहत्याबंदी कायदा करून या सरकार दूध व्यवसायिकांना देशोधडीला लावण्याचे काम करत आहे. भेसळीचे दूध, भ्रष्ट दूध संघवाल्यांमुळे दुध व्यवसायाचे वाटोळे केले आहे. दुधाच्या दराबाबत शासनाने ठोस भूमिका घेणे गरजेचे आहे. मात्र शासनही दुर्लक्ष करत आहे.- रघुनाथदादा पाटील, अध्यक्ष, शेतकरी संघटना.
उन्हाळ्यात दुधाचे दर वाढण्याएवजी कमी होत आहेत. अडचणीवर मात करत दूध व्यवसाय शेतकऱ्यांनी टिकवला. पण आता चांगले दर मिळू लागताच दर पाडण्याचे षडयंत्र रचले आहे. संघाच्या दुधाच्या विक्रीचे, दुग्धजन्य पदार्थांचे दर कायम असताना दूध दर पाडून शेतकऱ्यांच्या भावनांशी खेळ सुरु केला आहे. दूध उत्पादकांनी संघर्षाची तयारी ठेवावी.- सुरेश नवले, शेतकरी नेते, अकोले, जि. नगर.
ॲग्रोवनचे सदस्य व्हा
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.