Chama Market परभणी ः किमान आधारभूत किंमत खरेदी (MSP Procurement) योजनेअंतर्गत हमीभावाने हरभरा खरेदीसाठी (Chana Procurement) प्रतिहेक्टरी उत्पादकतेची मर्यादा वाढवावी, अशी मागणी स्वाभिमानी शेतकरी संघटनेतर्फे जिल्हा पणन अधिकारी के. जे. शेवाळे यांच्याकडे करण्यात आली आहे.

किमान आधारभूत किंमत खरेदी योजनेअंतर्गत शासकीय केंद्रावर शेतकऱ्यांकडून हरभरा खरेदीची मर्यादा प्रतिहेक्टरी ८ क्विंटल एवढी निश्‍चित करण्यात आली आहे. यंदा जिल्ह्यातील हरभऱ्याच्या उत्पादकतेत वाढ झाल्याचे पीक कापणी प्रयोगाच्या निष्कर्षांवरून आढळून येत आहेत.

त्यामुळे यापूर्वी निश्‍चित करण्यात आलेली प्रतिहेक्टरी ८ क्विंटलची उत्पादकता शेतकऱ्यांवर अन्यायकारक तसेच चुकीची आहे. हमीभावाने हरभरा खरेदीसाठी प्रतिहेक्टरी १५ ते २० क्विंटल एवढी उत्पादकता मर्यादा करण्यात यावी.

अशी मागणी स्वाभिमानी शेतकरी संघटनेचे जिल्हाध्यक्ष किशोर ढगे, भास्कर खटिंग, मुंजाभाऊ लोडे, प्रसाद गरुड, भगवान शिंदे, माउली लोडे, अंकुश शिंदे, हनुमान भोसले, मोकिंदा वावरे, बाळासाहेब घाटोळ, रामभाऊ आवकरगंड, डिंगाबर पवार, उद्धव जवंजाळ, मोकिंदा शिंदे, गजानन तुरे, सोपान आवचार यांनी केली आहे.