Nagpur News : आंतरराष्ट्रीय स्तरावर कांद्याचे दर तेजीत आहेत. मात्र देशात कांद्यावर निर्यातबंदी लादण्यात आली आहे. परिणामी, कांद्याची तस्करी वाढली आहे. अशाच एका प्रकरणात सीमा शुल्क विभागाच्या पथकाने नुकत्याच केलेल्या कारवाईत तब्बल ८२ टन कांदा जप्त करण्यात आला आहे. टोमॅटो निर्यातीआड ही कांदा तस्करी सुरू होती, अशी माहिती संबंधित खात्याच्या सूत्रांनी दिली.

केंद्र सरकारने कांदा निर्यातीस बंदी घातल्याने देशांतर्गत बाजारात कांद्याचे दर दबावात आहेत. कांदा उत्पादकांच्या खर्चाची भरपाई देखील होत नसल्याने त्यांच्यामध्ये केंद्र सरकारबद्दल रोष आहे. केंद्र सरकार केवळ ग्राहकहित पाहत असल्याचा कांदा उत्पादकांचा आरोप आहे.

दरम्यान, अशातच जादा दर मिळविण्याच्या अपेक्षेने देशातून कांदा तस्करी वाढली आहे. संत्रा, टोमॅटो तसेच इतर शेतीमालाच्या आडून ही तस्करी होत आहे. अशाच एका तस्करी प्रकरणाविषयी गोपनीय माहिती मिळालेल्या सीमा शुल्क विभागाने नागपुरात कारवाई केली.

नाशिकचे दोन निर्यातदार नागपुरातून संयुक्‍त अरब अमिराती (यूएई)मध्ये कांदा निर्यातीच्या प्रयत्नात होते. टोमॅटो निर्यातीच्या आडून ही तस्करी होणार होती. सीमा शुल्क विभागाच्या पथकाने चार कंटेनरची तपासणी केली.

या ४० फूट उंच कंटेनरमध्ये वरच्या पाच फुटांपर्यंत टोमॅटोचे बॉक्‍स होते. त्यानंतरच्या भागात बॉक्‍स तसेच पोत्यात ८२.९३ टन कांदा लपविण्यात आला होता. हा माल जप्त करण्यात आला आहे.