Jalgaon News : खानदेशात पपई दराचा तिढा मागील हंगामात अनेकदा तयार झाला. पण यंदा प्रतिकूल स्थितीमुळे पपई आवक अल्प किंवा कमी असून, शेतकऱ्यांना जागेवर किंवा थेट खरेदीत २८ रुपये प्रतिकिलोचा दर मिळत आहे.

प्रतिकिलोचा किमान दर २५ ते २६ रुपये आहे. शेतकऱ्यांना जागेवर दर बऱ्यापैकी मिळत आहे. परंतु उत्पादन कमी किंवा हवे तसे नाही. यंदाच्या अतिउष्णतेमुळे हंगाम लांबला आहे. परिणामी आवकेवर त्याचा परिणाम दिसत आहे. पपईचा काढणी हंगाम खानदेशात ऑक्टोबरमध्ये जोमात सुरू होतो.

यंदा विषम वातावरण व इतर समस्यांमुळे उत्पादन कमी आहे. रोपांची उपलब्धता यंदा चांगली होती. यात अनेकांनी पपईची लागवड मेमध्ये किंवा उशिरा केली आहे. यामुळे आवकही कमी आहे. दुसरीकडे खरेदीदारांकडून पपईस सध्या मागणी आहे.

सणासुदीचे दिवस आहेत. पपईचा उत्पादन खर्च यंदा वाढला आहे. जागेवर ४० रुपये प्रतिकिलोचा दर हवा, अशी मागणी शेतकऱ्यांनी लावून धरली जात आहे. मध्यंतरी शहादा (जि. नंदुरबार) येथील पपई उत्पादकांनी खरेदीदार, व्यापाऱ्यांशी दरांबाबत चर्चा केली. परंतु दरांत फारशी किंवा ४० रुपयांपर्यंतची वाढ झालेली नाही

खानदेशातील पपईला उत्तर भारतात मोठी मागणी आहे. उठाव वाढला आहे. अशात खरेदीदारांकडून वाहने आणून कमी पक्व पपईचीदेखील खरेदी केली जात आहे. कारण पपईचा तुटवडा आहे. सध्या खानदेशात रोज १५ ते २० ट्रक (एक ट्रक १६ टन क्षमता) पपईची आवक होत आहे.