Sangli News : सांगली, तासगाव आणि पंढरपूर या बाजारपेठांत बेदाण्याची आवक मंदावली असून मागणीत वाढ झाली आहे. त्यामुळे बेदाण्याच्या दरात पुन्हा तेजी आली आहे. गेल्या पंधरा दिवसांपासून बेदाण्याचे दर प्रति किलोस २० रुपयांनी वाढले आहेत. बेदाण्याच्या दरात वाढ होण्याचा अंदाज बेदाणा उद्योगातील जाणकारांनी व्यक्त केला आहे.

गत वर्षी राज्यात बेदाण्याचे तीन लाख उत्पादन झाले होते. सध्या राज्यात अंदाजे २५ ते ३० हजार टन बेदाणा शिल्लक आहे, असा अंदाज बेदाणा व्यापाऱ्यांनी वर्तविला आहे. सांगली, तासगाव आणि पंढरपूर या तिन्ही बाजार समितींत सौद्यात सरासरी दीड ते दोन हजार टन आवक होत आहे. त्यापैकी पन्नास टक्के बेदाण्याची विक्री होत आहे.

दिवाळीच्या सुट्टीनंतर अर्थात शून्य पेमेंट पूर्ण झाल्यानंतर डिसेंबर महिन्याच्या पहिल्या आठवड्यात सौदे सुरू झाले. डिसेंबर महिन्याच्या पहिल्या आठवड्यात बेदाण्याच्या दरात प्रति किलोस वीस रुपयांनी दर वाढले होते. यादरम्यान, बेदाण्याला दर्जानुसार प्रति किलोस १२० ते २२५ रुपये असा दर होता. त्यामुळे बेदाणा उत्पादक शेतकऱ्यांना दिलासा मिळाला.

गेल्या पंधरा दिवसांपासून बाजार समितीत बेदाण्याची मागणी आहे. मात्र गतवर्षीचा बेदाणा कमी राहिला आहे. त्यामुळे बेदाण्याची मागणीच्या तुलनेत पुरवठा होत नाही. परिणामी, बाजारात बेदाण्याची आवक मंदावली असल्याने दरात वाढ झाली आहे. त्यामुळे बेदाणा उत्पादक शेतकरी बेदाणा विक्रीसाठी पुढे येत असल्याचे चित्र आहे. डिसेंबर महिन्याच्या मध्यावर पुन्हा बेदाण्याचे दर प्रति किलोस २० रुपयांनी वाढले. अर्थात, एका महिन्यात दोन वेळा दर वाढले. त्यामुळे बेदाणा उत्पादक शेतकऱ्यांना मोठा दिलासा मिळाला आहे.

दर वाढण्याची शक्यता

शेतकरी वर्षभर बेदाणा विक्रीचे नियोजन करतो. गेल्या वर्षभर बेदाण्याचे दर टिकून राहिले. त्यामुळे शेतकऱ्यांनी बेदाणा विक्री केली. सध्या २५ ते ३० हजार टन बेदाणा शिल्लक असल्याने विक्रीसाठी बेदाणा कमी पडू लागला असल्याचे व्यापाऱ्यांचे म्हणणे आहे. नवीन बेदाणा येईपर्यंत हा बेदाणा पुरवठा येईल. वाढत्या मागणीमुळे बेदाण्याचे दर वाढण्याची शक्यता आहे.

बेदाणा दर (प्रति किलो)

हिरवा....१४५ ते २४०

काळा....४० ते १००