Nagpur News : सोन्याच्या दरात मोठी वाढ झाली आहे. गेल्या १५ दिवसांत सोनेदरात ३६०० रुपयांनी वाढ झाली. तर चांदीत २३०० रुपयांची वाढ झाली आहे. आंतरराष्ट्रीय बाजारात सोन्याचे भाव खूप जास्त आहेत. फेडरल रिझर्व्ह व्याजदरात कपात करेल या अपेक्षेने सोन्याचा दर वाढत असल्याचे तज्ज्ञांचे मत आहे.

गेल्या काही दिवसांपासून सोन्याच्या दरात लक्षणीय वाढ होत आहे. सोमवारी (ता. ११) जीएसटीसह २४ कॅरेट सोन्याचे १० ग्रॅमचे दर ६८ हजारांच्या जवळ पोहोचले. पंधरा दिवसांपूर्वी ६४ हजार ५०० रुपये असलेले सोने दरात पंधरा दिवसात ३,६०० रुपयांनी वाढ झाली.

चांदीचे भावही वाढले असून प्रतिकिलो ७३ हजार २०० रुपयांवर गेली आहे. पंधरा दिवसांपूर्वी चांदीचा दर ७० हजार ९०० रुपये होता. पंधरा दिवसांत दोन्ही धातूंनी मोठा पल्ला गाठला आहे.

रशिया-युक्रेन युद्धादरम्यान इस्राईल आणि हमास यांच्यातील लष्करी संघर्षामुळे जगभरात अनिश्चितता वाढली आहे. जगभरातील केंद्रीय बँका सोने खरेदी करत आहेत. विशेषतः सेंट्रल बँक ऑफ चायना सोन्याची मोठ्या प्रमाणावर खरेदी करत आहे.

चिनी नागरिक महागाई आणि देशातील अशांत शेअर बाजार आणि मालमत्ता क्षेत्राविरुद्ध बचाव म्हणून सोन्याचा साठा करत आहेत. त्यामुळे सोन्याच्या दरात वाढ झाली आहे. अशीच स्थिती राहिली तर लवकरच सोने उच्चांकी पातळी गाठण्याची शक्यता व्यक्त होत आहे.