Jalgaon News: सोने दरात मागील काही दिवसांत घसरणीचा कल दिसत आहे. मंगळवारी (ता. २४) सोने दर एका तोळ्यामागे (१० ग्रॅम) दोन हजार रुपयांनी कमी झाले. एक लाख रुपये प्रति तोळापर्यंत सोने दर पोहोचले होते. त्यात घसरण झाली आहे.

जळगावच्या सराफा बाजारात सोने दर प्रति तोळा ९७ हजार ४०० रुपये असे झाले आहेत. एप्रिल, मे महिन्यांत सोने दरात वाढ झाली. काही दिवस घट होती. पण लागलीच दरवाढही होत गेली. यामुळे सोने दरांनी एक लाख रुपयांचा पल्ला गाठला. सोन्यात मोठी गुंतवणूकही याच कालावधीत झाली.

आखातात अस्थिरता आल्यानंतर सोने दरवाढ सुरूच होती. त्यात लग्नसराईत सोन्यास मागणी होती. त्यात इराण व इस्राईल युद्धाने दरात वाढीचा कल होता. या महिन्याच्या मध्यात सोने दर एक लाख रुपये प्रति तोळा, असे झाले होते.

यानंतर किरकोळ घसरण सोने दरात झाली. ९९ हजार ४०० रुपये प्रति तोळा, असे दर या आठवड्यापर्यंत होते. परंतु मंगळवारी सोने दरात एक तोळ्यामागे दोन हजार रुपये घसरण झाली.

सोने दरात मागील काही दिवस घसरण झालेली असतानाच चांदी दरातही घट दिसत आहे. चांदी दरात मात्र किंचित घट झाली असून, मंगळवारी एक किलोमागे ५०० रुपये कमी झाले. चांदी दर एक लाख सात हजार रुपये प्रतिकिलो, असे आहेत.