Nagpur News : तापमानातील वाढीमुळे पोल्ट्री उद्योग क्षेत्रात मरतुकीचे प्रमाण वाढले आहे. यामुळे राज्यात अंड्याच्या उत्पादनात घट आली आहे. त्याचा परिणाम दरावर झाला असून अवघ्या चार दिवसांत प्रतिशेकडा अंड्याचे दर ३२० रुपयांवरून ५२० रुपयांवर पोहोचले आहेत.

राज्यात शेतीपूरक पोल्ट्री व्यवसाय करणाऱ्या शेतकऱ्यांची संख्या नऊ लाखांच्या घरात आहे. या माध्यमातून ब्रॉयलर चिकन तसेच लेयर पोल्ट्रीधारकांच्या माध्यमातून अंड्यांचे उत्पादन केले जाते. राज्याची रोजची सरासरी अंड्यांची गरज एक कोटींच्या घरात आहे. या मागणीची पूर्तता राज्यातील लेअर पोल्ट्रीधारकांकडून शक्य होत नाही. त्यामुळे हैदराबाद येथून देखील अंड्यांची आवक राज्यात होते.

चार दिवसांपूर्वी मागणी आणि आवक याचे प्रमाण समसमान असल्याने दर दबावात होते. त्यामुळेच सरासरी ३२० रुपये प्रति १०० नग या दराने अंड्यांचे व्यवहार होत होते, अशी माहिती अमरावती येथील पोल्ट्री व्यावसायिक रवींद्र मेटकर यांनी दिली. त्यानंतरच्या काळात मात्र मागणी आणि पुरवठा यात मोठी जरी निर्माण झाल्याने अंड्याच्या दरात सुधारणा अनुभवण्यात आली आहे.

हैदराबाद येथून आवक होणाऱ्या अंड्यांना सरासरी ४७० ते ४९० रुपये प्रतिशेकडा असा दर मिळत आहे. राज्यातील पोल्ट्री व्यवसायिकांना ५०० ते ५२० रुपये असा दर प्रतिशेकडा मिळत असल्याचे सांगण्यात आले. राज्यातील अनेक पोल्ट्री व्यावसायिकांनी तापमान नियंत्रणासाठी पोल्ट्री शेडवर अनेक प्रकारच्या उपाययोजना केल्या आहेत. त्यामध्ये वरच्या बाजूस स्प्रिंकलर बसविणे तुषार व इतर उपाययोजनांचा त्यामध्ये समावेश आहे.