Jalgaon News: खानदेशात केळी दरात जूनच्या अखेरीस घसरण दिसली. परंतु मागील चार ते पाच दिवसांत दरात सुधारणा सुरू आहे. दर २६०० रुपये प्रतिक्विंटलपर्यंत पोहोचले होते. सध्या निर्यातक्षम किंवा गुणवत्तापूर्ण केळीस कमाल दर २६०० रुपये प्रतिक्विंटल मिळत आहेत.

मागील वर्षी जुलैच्या सुरुवातीला केळीचे कमाल दर १३०० ते १४०० रुपये प्रतिक्विंटल होते. या तुलनेत यंदा जुलैतच चांगली दरवाढ झाली आहे. आषाढी एकादशी व अन्य बाबींसाठी केळीला मागणी राहिली. तर किमान दर १५०० ते १६०० रुपये प्रतिक्विंटल आहेत. मध्यम दर्जाच्या केळीस १८०० रुपये प्रतिक्विंटलचा दर आहे. केळी दरात मागील दोन-तीन दिवसांत सतत सुधारणा झाली आहे.

बऱ्हाणपूर येथील बाजार समितीत रविवारी (ता. ६) केळीला कमाल २६०० रुपये प्रतिक्विंटलचा दर मिळाला. या दरांनुसार जळगाव, धुळे व नंदुरबारमध्ये केळीची थेट किंवा शिवार खरेदीचा निर्णय खरेदीदार घेत आहेत.

खानदेशात केळीची आवक कमी होत आहे. सध्या प्रतिदिन १०० ते ११० ट्रक (एक ट्रक १६ टन क्षमता) केळीची आवक होत आहे. उशिराच्या मृग बाग केळीमधून सध्या केळीची काढणी सुरू आहे. केळीची आवक सध्या जळगावातील रावेर, यावल, मुक्ताईनगर, चोपडा, जळगाव, नंदुरबारमधील तळोदा, शहादा, अक्कलकुवा भागात सुरू आहे.

दर्जेदार केळीची थेट खरेदी करून शेतात पॅकिंग केली जात आहे. ही केळी काश्मीर, पंजाब, दिल्ली येथे पाठविली जात आहेत. केळीला उत्तरेकडे उठाव आहे. केळी आवकेत मागील १० ते १२ दिवसांत सतत घट झाली आहे. जूनच्या मध्यापर्यंत खानदेशात प्रतिदिन सरासरी १८० ते १८५ ट्रक केळीची आवक सुरू होती. मध्य प्रदेशातही केळी आवक कमी आहे.