Jalgaon News: खानदेशात केळी दरात सुधारणा झाली आहे. दर १००० ते २१०० व सरासरी १७०० रुपये प्रति क्विंटलपर्यंत पोहोचले आहेत. दरात मागील तीन ते चार दिवसांत सतत वाढ झाली असून, आवकेतही वाढ होत आहे.

केळीची आवक खानदेशात सध्या २२० ट्रक (एक ट्रक १६ टन क्षमता) एवढी आहे. मार्चमध्ये प्रतिदिन सरासरी २०० ट्रक केळीची आवक होत होती. त्यात मागील पाच ते सात दिवसांत वाढ झाली आहे. मध्य प्रदेशातील बऱ्हाणपूर येथेही सध्या ९० ते ९५ ट्रक केळीची आवक होत आहे. मागील हंगामात कुकुंबर मोझॅक विषाणूच्या (सीएमव्ही) भीतीने अनेकांनी एप्रिल व मे महिन्यात केळी लागवड केली होती.

एप्रिल व मेमध्ये लागवड केलेल्या केळी बागांमधील काढणी मेच्या मध्यापर्यंत वेगात सुरू होती. केळीची आवक मोठी व मागणी कमी, अशी स्थिती झाली होती. यामुळे एप्रिलमध्ये केळीदर ४०० ते ७०० रुपये प्रति क्विंटल असे होते. केळी दरात घसरणीमुळे जिल्हा प्रशासनाला हस्तक्षेप करावा लागला होता.

व्यापाऱ्यांना तंबी द्यावी लागली होती. यंदा मात्र केळी दरात सुधारणा दिसत आहे. मार्च महिन्यात केळीला सरासरी १५०० रुपये प्रति क्विंटलचा दर मिळाला. परंतु या महिन्यात केळी दरात सुधारणा झाली. कमाल दर मध्य प्रदेशातील बाजारांत २१०० रुपयांपर्यंत पोहोचला आहे. खानदेशात केळीची थेट किंवा शिवार खरेदी केली जाते.

यामुळे शिवार खरेदीत केळीला कमाल १८०० ते २००० रुपये प्रति क्विंटलचा दर खानदेशात आहे. किमान दर १००० रुपये प्रति क्विंटल, असा आहे. केळीची पाठवणूक उत्तर भारतात केली जात आहे. दिल्ली, काश्मिरात पाठवणुकीच्या केळीचे दर २१०० रुपयांपर्यंत आहेत.