Akola News : स्थानिक कृषी उत्पन्न बाजार समितीत गुरुवारी (ता. ३१) नवीन मुगाची आवक झाली. या मुहूर्ताच्या मुगाला १०१११ रुपये प्रतिक्विंटल दर देण्यात आला. मूग विक्रीला आणणारे बेलखेड येथील शेतकरी शंकरराव खुमकर यांचा यावेळी सत्कार करण्यात आला. दरम्यान बाजार समितीत आवक झालेल्या मुगाला सरासरी १० हजार ते १० हजार १११ रुपये दर मिळाला.

यंदाच्या हंगामात लागवड केलेल्या मुगाची काढणी सुरू झाली. तेल्हारा तालुक्यातील बेलखेड शिवारात यंदाच्या हंगामातील मुगाची काढणी करून खुमकर यांनी विक्रीसाठी आणला होता.

या वेळी त्यांचा शाल श्रीफळ देऊन सत्कार करण्यात आला. तसेच कृषी उत्पन्न बाजार समितीचे सभापती सुनील इंगळे यांनीही त्यांचा सत्कार केला.

या वेळी उपसभापती प्रा. प्रदीप ढोले, डॉ. अशोकराव बिहाडे, प्रा. सुधाकर येवले, किसनराव बोडखे, व्यापारी हरीश तापडिया, संजय टावरी, पप्पू केला व शेतकरी उपस्थित होते.