Jalgaon News : खानदेशातील प्रमुख बाजार समित्यांत लिंबाची आवक कमी आहे. उठाव बऱ्यापैकी असून, मागील १० ते १५ दिवसांत लिंबूला चांगले दर मिळाले आहेत. सध्या कमाल २५० रुपये प्रतिकिलोचा दर लिंबास आहे. कमी दर्जा, लहान आकारातील लिंबाचा दर २०० रुपये प्रतिकिलोपर्यंत आहे.

ऊन सतत वाढले आहे. मागील १० ते १२ दिवसांत तापमान ४५ अंश सेल्सिअसपर्यंत पोहोचले आहे. उन्हापासून बचाव करण्यासाठी घरोघरी व बाजारातही लिंबू सरबताची मागणी वाढली आहे. परिणामी लिंबाला मागणी वाढली आहे. बाजारात लिंबाची आवक कमी असल्याने दर वधारले आहेत. या महिन्याच्या सुरुवातीला लिंबाचे दर १०० ते १५० रुपये प्रतिकिलोपर्यंत होते.

खानदेशात धुळे, नंदुरबार, जळगाव, चाळीसगाव, भडगाव-पाचोरा या बाजारांत लिंबाची आवक होत असते. सध्या प्रतिदिन २० ते २१ क्विंटल लिंबाची आवक बाजारात होत आहे. काही बाजारात आवकच नाही. विविध शहरांतील खरेदीदार धुळे, पाचोरा-भडगाव, चाळीसगाव, जामनेर, छत्रपती संभाजीनगर भागांतून लिंबाचा पुरवठा करून घेत आहेत.

जळगावातील चोपडा, यावल, रावेर, धुळ्यातील शिरपूर, नंदुरबारातील शहादा भागात लिंबू बागा फारशा नाहीत. लिंबू बागा जळगावातील एरंडोल, पाचोरा, जामनेर, चाळीसगाव, भडगाव, पारोळा, अमळनेर, धुळ्यातील साक्री, धुळे आदी भागांत अधिक आहेत. पाचोरा, भडगाव, चाळीसगाव भागांतील लिंबू मुंबई, नाशिक भागांतील खरेदीदार मागवून घेत आहेत.

खानदेशात मार्च महिन्यासह त्यापूर्वीही बेमोसमी, वादळी पाऊस झाला होता. पाचोरा, भडगाव, जामनेरात गारपीटही झाली. यामुळे लिंबास फटका बसला आहे. परिणामी लिंबाची आवक कमी आहे, अशी माहिती मिळाली. पुढेही लिंबाची आवक फारशी राहणार नाही, अशी स्थिती आहे.