Tur Rate : देशातील बाजारात आता नव्या तुरीची आवक वाढत आहे. मात्र पुरवठा साखळीत (Tur Supply Chain) तुरीचा ठणठणाट आहे. तर देशातील उत्पादनात यंदा मोठी घट आली. त्यामुळे बाजारात येणाऱ्या तुरीला लगेच उठाव मिळत आहे. तर दरही तेजीत आहेत.

म्यानमारमधून आयात होणाऱ्या तुरीचेही दर जास्त आहेत. त्यामुळे यंदा तुरीचे भाव प्रतिक्विंटल ७ हजार ते ८ हजार रुपयांच्या दरम्यान राहू शकतात, असा अंदाज तूर बाजारातील अभ्यासकांनी व्यक्त केला.

केंद्र सरकारने आपल्या पहिल्या अंदाजात यंदा देशात जवळपास ३९ लाख टन तूर उत्पादनाचा अंदाज व्यक्त केला.

मात्र नुकतेच केंद्रीय खाद्य सचिवांनी यंदा देशातील तूर उत्पादन ३२ ते ३३ लाख टनांच्या दरम्यानच स्थिरावेल, असा अंदाज व्यक्त केला. तर बाजारातील व्यापारी आणि जाणकारांच्या मते यंदा देशात ३० लाख टनांपेक्षा जास्त उत्पादन होणार नाही.

देशातील अनेक बाजारांमध्ये आता नव्या तुरीची आवक वाढली आहे. तूर उत्पादनात आघाडीवर असलेल्या कर्नाटक आणि महाराष्ट्र या दोन राज्यांमध्ये आवक सुरु झाली.

व्यापाऱ्यांनी दिलेली माहिती आणि बाजार समित्यांमधील आवकेच्या माहितीवरून, देशात आता जवपास १३ लाख क्विंटल नवी तूर बाजारात आली आहे.

कर्नाटकातील आवक

देशातील बाजारात विक्री झालेल्या एकूण १३ लाख क्विंटल तुरीपैकी सर्वाधिक माल कर्नाटकातील आहे. कर्नाटकात आत्तापर्यंत जवळपास ८ लाख क्विंटल तूर बाजारात आली. कर्नाटकातील तलिकोट बाजारात सर्वाधक २ लाख क्विंटलची आवक झाली.

तर मुद्दबिहाल बाजारात १ लाख ७१ हजार, रायचूर १ लाख ५५ हजार, गुलबर्गा १ लाख २१ हजार आणि बिदर बाजारात १ लाख क्विंटल तुरीची आवक झाली होती.

महाराष्ट्रातील तूर आवक

महाराष्ट्रातील बाजारात जवळपास ५ लाख क्विंटल तूर दाखल झाली होती. सोलापूर बाजारात सर्वाधिक १ लाख ३८ हजार क्विंटल तूर आतापर्यंत आली. त्यानंतर जालना बाजारात १ लाख १३ हजार क्विंटल, अकोला ६३ हजार, खामगाव ७६ हजार, लातूर ६१ हजार आणि बार्शी बाजारात ७८ क्विंटल आवक झाली.

दराची स्थिती

देशात यंदा जुन्या तुरीची उपलब्धता कमी आहे. त्यामुळे प्रक्रिया उद्योग खरेदीत सक्रिय आहे. तर म्यानमारमधून येणाऱ्या तुरीचे भावही सध्या प्रतिक्विंटल ७ हजार रुपयांच्या वरच आहेत.

त्यामुळे सध्या नव्या तुरीतील ओलावा जास्त असला तरी भाव ७ हजार ते ७ हजार ५०० रुपयांच्या दरम्यान आहेत. यंदा देशातील उत्पादनाची स्थिती पाहता तुरची सरासरी दरपातळी ७ हजार ते ८ हजार रुपयांच्या दरम्यान राहू शकते, असा अंदजा तूर बाजारातील अभ्यासकांनी व्यक्त केला.