Chhatrapati Sambhajinagar : कापसाच्या खरेदीवर लावला जाणारा आरसीएम कर रद्द करा, बाजार समितीच्या करात एक समानता आणा, कापूस गाठी निर्यात करणाऱ्यांना दिल्या जाणाऱ्या प्रोत्साहनात जिनिंगचा वाटा ठेवा, नवीन युनिट प्रमाणेच जुन्या युनिटलाही सोलर प्लांटसाठी सबसिडी द्या, आदी मागण्या महाराष्ट्र कापूस असोसिएशनने केंद्रीय अर्थराज्यमंत्री डॉ. भागवत कराड यांच्यासमोर ठेवल्या.

महाराष्ट्र कापूस असोसिएशनमध्ये विदर्भ आणि मराठवाड्यातील जिल्ह्यातील कापसाचे व्यापार करणारे जिनिंग व्यवसाय करणारे समाविष्ट आहेत. असोसिएशनच्या पदाधिकाऱ्यांनी केंद्रीय अर्थ राज्यमंत्री डॉ. भागवत कराड यांची मंगळवारी (ता. २०) भेट घेतली.

कापसाच्या खरेद- विक्री संदर्भात येणाऱ्या अडीअडचणी यासह केंद्र आणि राज्य सरकारची कापूस विषयी असलेली धोरणात सुधारणा, जिनिंग मिल्स यांना आवश्यक असलेली करांमध्ये सवलत, कृषी उत्पन्न बाजार समिती कापसाच्या खरेदी- विक्री व्यवहारावर लावत असलेला कर,

जिनिंग मिलची विजेची सबसिडी, यासह जिनिंग मिल येथे बसवण्यात आलेले सोलार प्लांट तसेच विविध योजनेचे अनुदान मिळण्याबाबत मागण्यांचे निवेदन देत याविषयी सविस्तर मांडणी कापूस असोसिएशनच्या पदाधिकाऱ्यांनी केंद्रीय अर्थ राज्यमंत्री डॉ. कराड यांच्यासमोर केली.

या वेळी असोसिएशनचे पदाधिकारी विजय अग्रवाल, विजय बियाणी, रसदीप सिंग चावला, ओम प्रकाश डागा, निखिल अग्रवाल, यश अग्रवाल, प्रल्हाद तायल, रामेश्‍वर राठी आणि अजय सोमानी यांच्यासह कॉटन असोसिएशनचे पदाधिकारी उपस्थित होते.