Ratnagiri News : हापूस आंब्याचा हंगाम पावस परिसरात अंतिम टप्प्यात आहे. वाशीतील बाजार समितीमध्ये आवक वाढल्यामुळे दिवसेंदिवस हापूसचे दर कमी झाले आहेत. त्यामुळे कॅनिंगला आंबा देण्यास सुरवात झाली आहे. सध्या कॅनिंगचा किलोचा दर ३० रुपये मिळत आहे.

हापूसला सुरवातीला चांगला दर मिळत होता. मात्र आता आंब्याची आवक वाढल्यामुळे दर काहीसे कमी झाले आहेत. त्यामुळे आंबा बागायतदार हवालदिल झाले आहेत. प्रतिकूल परिस्थितीतून मार्ग काढत बागायतदार व्यवसाय करत आहेत.

दुसऱ्या टप्प्यातील आंबा मे महिन्यात तयार होण्याची शक्यता आहे. त्यामधून मिळणारे उत्पादन हे पावसाच्या आगमनावर अवलंबून आहे.

आंबा मोठ्या प्रमाणात येत असल्यामुळे वाशी बाजारातील दर उतरले आहेत. काही बागायतदार कमी दर्जाचा आंबा कॅनिंगसाठी देत आहेत.

आंबा बागायतदार अण्णा गुरव म्हणाले, ‘‘यंदा आंबा पीक चांगले असल्यामुळे त्याला दरही चांगला मिळत आहे. मात्र, आंबा कमी झाल्यामुळे आंब्याची राखण होत नाही. त्यामुळे रात्री आंबा चोरी होत आहे.’’